Qasym-Jomart Toqaev qazaqstandyqtardy Respýblıka kúnimen quttyqtady

ASTANA. KAZINFORM – Memleket basshysy Qasym-Jomart Toqaev Qazaqstan halqyn Respýblıka kúnimen quttyqtady, dep habarlaıdy Aqordanyń baspasóz qyzmeti.

Qymbatty otandastar!

Respýblıka kúni qutty bolsyn! 

Qazaqstan osydan 35 jyl buryn Egemendik deklaratsııasyn qabyldap, jańa dáýirge qadam basty. Tarıhı qujatta halqymyzdyń óz bolashaǵyn derbes aıqyndaý quqyǵy naqty kórinis tapty. Sol arqyly bostandyqtyń baıraǵyn kóterip, zamanaýı memleket qurýymyzǵa jol ashyldy. Sodan beri elimiz qıyn da kúrdeli joldan ótti.

Biz Táýelsizdigimizdiń saıası-ekonomıkalyq tuǵyryn bekittik, shekaramyzdy aıqyndap, ony búkil álemge tanyttyq, jańa astanamyzdy saldyq. Sondaı-aq jalpyulttyq biregeıligimizdi nyǵaıtý, azamattarymyzdyń ál-aýqatyn arttyrý jolynda zor jetistikke qol jetkizdik. Qazaqstan salıqaly ári syndarly syrtqy saıasatynyń arqasynda óziniń ulttyq múddesine adal, halyqaralyq abyroı-bedeli joǵary memleket retinde qalyptasty. Degenmen aldymyzda budan da zor mindetter tur.

Biz qazirgi almaǵaıyp zamandaǵy orasan syn-qaterlerge qaramastan, barlyq azamatqa birdeı múmkindik beretin Ádiletti Qazaqstandy quryp jatyrmyz. Saıasattaǵy, ekonomıka men áleýmettik saladaǵy reformalar Otanymyzdyń ósip-órkendeýin qamtamasyz etip, halqymyzdyń turmys sapasyn arttyrýdy kózdeıdi.

Biz «Zań jáne tártip» qaǵıdatyn, «Taza Qazaqstan» ıdeologııasyn, otanshyldyq pen tileýlestik, eńbekqorlyq pen jaýapkershilik, bilimpazdyq pen kásibılik qundylyqtaryn qoǵamda barynsha ornyqtyryp, keleshegine senimmen qaraıtyn ozyq oıly ult retinde qalyptasyp kelemiz. Ár býynnyń óz mıssııasy bar. Osy oraıda, babalar ósıetin umytpaı, qasterli Táýelsizdigimizdi nyǵaıta túsý, Qazaqstandy damyǵan, jasampaz ári ádiletti el etý – bárimizge ortaq paryz.

Biz eseli eńbektiń, ózara qoldaýdyń jáne eń bastysy, myzǵymas birliktiń arqasynda barlyq josparymyzdy tabysty júzege asyryp, jańa belesterdi baǵyndyra beretinimizge senimdimin. Elimizdiń keleshegi – árqaısymyzdyń qolymyzda.

Qazaqstannyń kók týy árdaıym bıikte jelbiresin!

Barshańyzǵa zor densaýlyq, baq-bereke jáne mol tabys tileımin!

Aıta keteıik, keshe Memleket basshysy Qasym-Jomart Toqaev Respýblıka kúnine arnalǵan saltanatty jıynda sóz sóıledi.

Sondaı-aq Prezıdent Respýblıka kúni qarsańynda bir top azamatty memlekettik nagradamen marapattady.