Qasym-Jomart Toqaev pravoslav qaýymyn Pasha merekesimen quttyqtady
ASTANA. KAZINFORM — Memleket basshysy Qasym-Jomart Toqaev qazaqstandyq pravoslav qaýymyn Pasha merekesimen quttyqtady. Bul týraly Aqordanyń baspasóz qyzmeti málim etti.
— Memleket basshysy Qasym-Jomart Toqaevtyń Pasha merekesimen quttyqtaýy Qurmetti elimizdiń pravoslav qaýymy! Sizderdi Pasha merekesimen quttyqtaımyn! Hrıstıan jylnamasynda erekshe oryn alatyn bul mereke úmit pen súıispenshiliktiń, rýhanı jańarýdyń sımvoly sanalady. Pasha meıramynda jáne oǵan daıyndyq kezeńinde janashyrlyq, meıirimdilik, tatý kórshilik, ózara kómek qasıetteri el ishinde keńinen dáripteledi. Pravoslav qaýymy qoǵamda ádildik, beıbitshilik, kelisim, tózimdilik jáne senim qaǵıdattaryn qalyptastyrýǵa eleýli úles qosyp keledi. Urpaqtan urpaqqa jalǵasqan Pasha dástúri otbasyndaǵy yntymaqty saqtaýǵa jáne adamgershilik qarym-qatynasty nyǵaıtýǵa yqpal etedi, úlkenge qurmet kórsetip, jaqynyńa janashyr bolýǵa baýlıdy. Ulttyq birlik pen konfessııaaralyq kelisimniń saqtalýy, dástúrli qundylyqtar men jan-jaqty jańǵyrýǵa degen umtylystyń úılesim tabýy elimizdiń ósip-órkendeýine arqaý bolyp otyr. Halqymyz beıbitshilik pen turaqtylyq, zań men tártip, bilim men ınnovatsııa, qorshaǵan ortaǵa qamqorlyq pen tazalyq qaǵıdattary berik ornyqqan ozyq elde ómir súrip, eńbek etýge umtylady. Respýblıkalyq referendýmda qabyldanǵan Halyq Konstıtýtsııasy — sonyń aıqyn dáleli. Biz qasterli Otanymyzdyń bolashaǵy jolyndaǵy ortaq jaýapkershilikti tereń sezine bilsek, kez kelgen syn-qaterdi eńserip, bıik maqsattarymyzǵa jetetinimizge kámil senemin. Osy jarqyn mereke árbir shańyraqqa shattyq pen baq-bereke syılasyn! Barshańyzǵa zor densaýlyq, mol baqyt jáne tolaǵaı tabys tileımin, — delingen habarlamada.
Aıta keteıik, buǵan deıin Memleket basshysy Ózbekstannyń halyqaralyq bedeliniń artýyna senim bildirdi.
