Qasym-Jomart Toqaev qazaqstandyqtardy Alǵys aıtý kúnimen quttyqtady
ASTANA. KAZINFORM — Memleket basshysy Qasym-Jomart Toqaev qazaq jurtyn Alǵys aıtý kúnimen quttyqtady. Bul týraly Aqorda málim etti.
— Qurmetti otandastar! Sizderdi Alǵys aıtý kúnimen quttyqtaımyn! Bul — halqymyzdyń eń asyl qundylyqtaryn dáripteıtin erekshe mereke. Ózara qurmet kórsetý, ózgege janashyrlyqpen qarap, shynaıy tileýles bolý — ultymyzdyń boıyna sińgen qasıetter. Alǵys aıtý dástúri tól rýhanııatymyzdyń temirqazyǵy retinde el ishindegi senim men birlikti nyǵaıtýǵa zor yqpal etip keledi. Jaqyndarymyzǵa alǵys aıtý — olarǵa rýhanı qoldaý kórsetý, qıyn kezde qol ushyn sozý degen sóz. Qazirgi qubylmaly zamanda bul qasıettiń mán-mańyzy erekshe, — delingen habarlamada.
Prezıdent osy meıramda eń aldymen qıyn-qystaý jyldary elimizdi aman saqtap, urpaqqa asa qundy ári mol mura qaldyrǵan ata-babalarymyzǵa taǵzym etetinimizdi aıtqan.
– Ustazdarǵa, dárigerlerge, mádenıet salasy qyzmetkerlerine, kásipkerlerge, jumysshylarǵa, tártip saqshylaryna, órt sóndirýshilerge, qutqarýshylarǵa jáne adal eńbegimen súıikti Otanymyzdyń ósip-órkendeýine eleýli úles qosyp júrgen barsha azamatqa alǵys aıtamyz. Sondaı-aq jastarǵa jáne eriktilerge erekshe rızashylyǵymdy bildiremin. Belsendi azamattyq ustanymy bar, qoǵam ıgiligi úshin eńbek etýge ázir, muqtaj jandarǵa kómektesýge daıyn adamdardyń eńbegi eren. Bul — Jasampaz ári Jaýapty otanshyldyqtyń aıqyn kórinisi. Elimiz aýqymdy ári tarıhı betburys kezeńine qadam basty. Respýblıkalyq referendýmǵa shyǵarylǵan jańa halyqtyq Konstıtýtsııanyń jobasy adam quqyqtaryn qorǵaý júıesin jaqsartýǵa, bılik ınstıtýttarynyń jaýapkershiligin kúsheıtip, tıimdiligin arttyrýǵa, qasterli Táýelsizdigimiz ben Egemendigimizdi nyǵaıtýǵa múmkindik beredi. Jańa Ata Zań bárimiz bir el bolyp irgesin qalap jatqan jarqyn bolashaqqa jol ashady, – dedi Memleket basshysy.
Prezıdenttiń sózinshe, Alǵys aıtý kúni el taǵdyry árbir azamattyń qolynda ekenin ańǵartady. Sebebi aldaǵy ózgeristerdiń tabysty júzege asyrylýy jurtymyzdyń birligine, parasattylyǵyna jáne sanaly azamattyq ustanymyna baılanysty.
— Biz Zań men Tártip, tilektestik pen yntymaq qaǵıdalaryn basshylyqqa alyp, salt-dástúrimizdi saqtaı bilsek, Qýatty, Ádiletti, Taza, Órkendegen Qazaqstandy qura alamyz. Tatýlyq pen ózara senimdi nyǵaıta otyryp, qasıetti Otanymyz — Qazaqstan Respýblıkasyn kórkeıtý jolynda bıik maqsattarymyzǵa birge jetemiz dep senemin. Barshańyzǵa amandyq, tabys tileımin, — dep Qasym-Jomart Toqaev quttyqtaýyn joldady.
Aıta keteıik, Qazaqstanda jyl saıyn 1 naýryz – Alǵys aıtý kúni – el turǵyndary arasynda ózara qurmet pen rızashylyq sezimin arttyrýǵa arnalǵan mańyzdy mereke retinde atalyp ótedi.