Qasym-Jomart Toqaev: Qazaqstan — shyǵys pen batys arasyndaǵy altyn kópir

TARAZ. KAZINFORM — Biz bul múmkindikti utymdy paıdalanýymyz qajet. Qazaqstan Eýrazııa qurlyǵyndaǵy tranzıt haby retinde qalyptasýy ábden múmkin. Bul týraly Memleket basshysy Jambyl oblysynyń jurtshylyǵymen kezdesý barysynda aıtty.

Prezıdent sonymen qatar qazir ekonomıkamyzda túbegeıli ózgerister jasalyp jatqanyn aıtty.

— Biz el ekonomıkasynyń damýyna qosymsha serpin berý úshin mańyzdy jobalardy qolǵa aldyq. Búginde sol jumystyń nátıjesin de kóre bastadyq. Sońǵy bes jylda ulttyq ekonomıka 15,8 paıyzǵa ósti. Bıylǵy ósim 6 paıyzdan asty. Bul — 2012 jyldan bergi eń joǵary kórsetkish. Jan basyna shaqqanda ishki jalpy ónim 47 paıyzǵa artty. Altyn-valıýta rezervi jáne Ulttyq qor aktıvteriniń kólemi rekordtyq mejege jetip, 125 mıllıard dollardan asty, — dedi Toqaev.

Memleket basshysy bıyl «Dostyq — Moıynty» temirjolynyń ekinshi jelisi merziminen buryn iske qosylǵanyn atap ótti. Bul — Táýelsizdik kezeńindegi eń iri temirjol qurylysy. Birneshe aıda osy jolmen qosymsha 6 mıllıon tonna júk tasymaldandy. Qazir «Moıynty — Qyzyljar» baǵytynda temirjol salynyp jatyr.

— Qazaqstan — shyǵys pen batystyń arasyndaǵy altyn kópir. Biz bul múmkindikti utymdy paıdalanýymyz qajet. Osy jyly 13 myń shaqyrym avtokólik joly salynyp, jóndelip jatyr. Áýe qatynasyn damytý isine de basa mán berilip jatyr. Álemniń iri qalalarymen tikeleı qatynas ornatylyp jatyr, 36 jańa áýe reısi ashyldy. Osylaısha, Qazaqstan Eýrazııa qurlyǵyndaǵy tranzıt haby retinde qalyptasýy ábden múmkin. Bul — strategııalyq mańyzy bar maqsat. Sondaı-aq ınternet elimizdegi azamattardyń 90 paıyzyna qoljetimdi boldy. Qazaqstan — Starlink jelisine ıe bolǵan Ortalyq Azııadaǵy alǵashqy memleket. Elimiz qurylys salasynda zor tabysqa jetti. Bıyl 19 mıllıon sharshy metrden astam turǵyn úı salyndy. Myńdaǵan otbasy baspanaly boldy, — dedi ol.

Budan buryn Jambyl oblysynda jumys saparymen júrgen Memleket basshysy Qasym-Jomart Toqaev Dala Glass áınek óndiretin kásiporyn qyzmetimen tanysqanyn jazǵanbyz.

Sonymen qatar bıyl Jambyl oblysyna 600 mlrd teńgege jýyq ınvestıtsııa tartylǵany belgili boldy.

Prezıdent Jambyl oblysynyń ekonomıkasyn kúsheıtý kerek ekenin, oǵan qajetti jaǵdaı da, múmkindik te bar ekenin basa aıtty.