Qasym-Jomart Toqaev Qazaqstan men Reseı arasynda qol qoıylǵan deklaratsııa jóninde pikir bildirdi

MÁSKEÝ. KAZINFORM – Qasym-Jomart Toqaev pen Vladımır Pýtın buqaralyq aqparat quraldaryna birlesken málimdeme jarııalady. Onda Qasym-Jomart Toqaev Qazaqstan men Reseıdiń qarym-qatynasyn jan-jaqty strategııalyq seriktestik pen odaqtastyq deńgeıine jetkizý jónindegi deklaratsııa týraly pikir bildirdi, dep habarlaıdy Aqordanyń baspasóz qyzmeti.

- Bul qujattyń tarıhı máni zor. Halyqtarymyz arasyndaǵy myzǵymas ózara senim men yntymaqtastyqtyń keleshegi kemel ekenin kórsetedi. Osy oraıda ekijaqty baılanysty nyǵaıtýǵa eleýli úles qosqany úshin Vladımır Vladımırovıch Pýtınge shynaıy rızashylyǵymdy bildiremin. Qazaqstandyqtar Reseı Prezıdentin jahandyq aýqymdaǵy memleket qaıratkeri dep biledi ári qurmetteıdi. Onyń esimi álemge jaqsy málim jáne qazirgi almaǵaıyp zamanda orys halqy men Reseı memleketiniń múddesin qorǵaý isinde senim men qajymas qaırattyń sımvoly retinde qabyldanady. Qazaqstan Reseı Federatsııasynyń órkendeýine shyn máninde múddeli. Búgingi kelissózder nátıjesin joǵary baǵalaımyn. Kezdesýimiz ashyq ári senimdi ráýishte ótti jáne naqty paıdasyn berdi, - dedi Qasym-Jomart Toqaev.

Sondaı-aq Prezıdent barlyq deńgeıde qarqyndy dıalogty qoldaýǵa ýaǵdalasqanyn jetkizdi.

- Ónerkásip, energetıka, kólik-logıstıka, aýyl sharýashylyǵy, joǵary tehnologııalar, tsıfrlandyrý, gýmanıtarlyq yqpaldastyq, sondaı-aq jańa ınfraqurylymdyq jobalardy júzege asyrý máselelerine basa mán berdik. Kúrdeli halyqaralyq ahýalǵa qaramastan yntymaqtastyǵymyz halyqtarymyzdyń ıgiligi jolynda belsendi damyp kele jatqanyna kóńilimiz tolatynyn atap óttik, - dedi Prezıdent.

Aıta keteıik, osyǵan deıin Qasym-Jomart Toqaev Qazaqstan men Reseı qarym-qatynasy jan-jaqty strategııalyq áriptestik pen odaqtastyq deńgeıine kóshetinin aıtqan bolatyn.