Qasym-Jomart Toqaev Qazaqstan men Qytaı arasyndaǵy birlesken jumystyń 5 baǵytyn atady
ASTANA. KAZINFORM – Memleket basshysy Qasym-Jomart Toqaev Sınhýa aqparat agenttigine bergen suhbatynda eki eldiń arasyndaǵy jumystyń 5 baǵytyn atady.
«Tabysty ekijaqty yntymaqtastyqtyń 32 jyl boıy qýatty negizin qalaǵanymyzdy eskere otyryp, Qazaqstan tatý kórshilik qarym-qatynasty odan ary nyǵaıtý, alys-beristi jandandyrý jáne praktıkalyq ózara is-qımyldy tereńdetý úshin bar kúsh-jigerin salýǵa daıyn. Sondyqtan da osynaý kezeńde birlesken jumystyń 5 baǵyty asa mańyzdy.
Investıtsııalyq saladaǵy yntymaqtastyqty tereńdetý. Aýyl sharýashylyǵy, jańa energetıka, mashına jasaý syndy salalarǵa erekshe nazar aýdarǵan jón. Sonymen qatar ındýstrıalandyrý men qosylǵan quny joǵary ónim óndirisine de jumylý qajet.
Saýda qurylymyn ártaraptandyrý men taýarlar ataýlaryn arttyrýdy qosa alǵanda elderimiz arasyndaǵy taýar aınalymyn arttyrý. Zamanaýı quraldardy, onyń ishinde elektrondy kommertsııa men elektrondy saýda alańdaryn paıdalaný kerek», - dedi Memleket basshysy.
QR Prezıdenti 2024 jyl «Bir beldeý, bir jol» jahandyq bastamasyn odan ary ilgeriletý úshin mańyzdy jyl sanalatynyn atap ótti.
«Ol bastamalardyń kezekti 10 jyldyǵy sanaǵymen erekshe. Biz úshin osynaý mega bastamanyń negizgi áli buljymas qatysýshysy, sondaı-aq senimdi eýrazııalyq kólik haby jáne «Bir beldeý, bir joldyń» ortalyq logıstıkalyq toraby retinde Qazaqstannyń rólin kúsheıtý asa mańyzdy. Bul rette bizdiń nazarymyz Lıanıýngan portynyń, Sıan qalasyndaǵy qurǵaq porttyń jáne «Qorǵas – Shyǵys Qaqpa» AEA-nyń múmkinshiligin belsendi paıdalanýǵa basa nazar aýdarylady.
Eki eldiń kólik yntymaqtastyǵyn keńeıtý. Búginde «Dostyq-Moıynty» temir jol ýchaskesiniń ekinshi jolyn salý jalǵasyp jatyr. Munan bólek, bizdiń ortaq shekaramyzda úshinshi temir jol ótkizý pýnktin salýdy bastaý mejelengen.
Mádenı-gýmanıtarlyq saladaǵy kópqyrly ózara is-qımyldy jandandyrý. Vızasyz rejım ornatý, ózara mádenı ortalyqtaryn, «Lý Ban sheberhanasyn», JOO fılıaldaryn ashý, sonymen qatar áýe reısterin ulǵaıtý boıynsha turaqty jumys halyqtarymyz arasyndaǵy ózara túsinistik pen dostyqty odan ary nyǵaıtý jolyndaǵy mańyzdy qadam bolmaq. Elderimiz Qazaqstan men Qytaı arasyndaǵy qarym-qatynastyń jańa «altyn 30 jyldyǵy» aıasynda bizdi jarqyn bolashaq jolynda biriktiretin úlken jetistikter men jeńister kútip tur dep senimmen aıtýǵa bolady», - dedi Qasym-Jomart Toqaev.
