Qasym-Jomart Toqaev Qatar Ámiri sheıh Támım ben Hamad Ál Tánımen kezdesti
ASTANA. KAZINFORM –Memleket basshysy Doha forýmyna shaqyrǵany úshin sheıh Támım ben Hamad Ál Tánıge alǵys aıtyp, atalǵan jıyn álemdegi ózekti problemalar boıynsha ashyq pikir almasýǵa múmkindik beretin biregeı dıalog alańy ekenin aıtty, dep habarlaıdy Aqordanyń baspasóz qyzmeti.
Qasym-Jomart Toqaev Qatar Ámiriniń strategııalyq seriktestik deńgeıine kóterilgen ekijaqty qarym-qatynasty nyǵaıtýǵa qosqan úlesin joǵary baǵalady.
Áńgimelesý barysynda bank, telekommýnıkatsııa, energetıka, aýyl sharýashylyǵy jáne medıtsına salalaryndaǵy ınvestıtsııalyq jobalarǵa qatysty kelisimderdi ýaqytyly ári sapaly júzege asyrý máselesine erekshe mán berildi. Qazaqstan Prezıdenti Qatar bıznesimen birlesken jobalar eki eldiń damýyna septigin tıgizetinine senimdi ekenin atap ótti.
Qatar Ámiri Astana men Doha arasyndaǵy yntymaqtastyq uzaqmerzimdi strategııalyq sıpat alǵanyn jetkizdi. Sondaı-aq ekijaqty sapar barysynda qabyldanǵan sheshimderdi iske asyrý boıynsha úkimetter júıeli jumys atqaryp jatqanyna toqtaldy.
Qasym-Jomart Toqaev pen sheıh Támım ben Hamad Ál Tánı joǵary deńgeıdegi belsendi saıası dıalog qazaq-qatar qatynastaryn nyǵaıtýǵa aldaǵy ýaqytta da yqpal etetinine nazar aýdardy.
Prezıdent Doha forýmynyń ashylý saltanatyna mártebeli meıman retinde qatysqan bolatyn.