Qasym-Jomart Toqaev: Qasterli qos merekeniń qatar kelýin jaqsylyqqa balaımyz

ASTANA.KAZINFORM - Memleket basshysynyń atynan Ulttyq quryltaı qatysýshylaryna aýyzashar berildi. Bul týraly Aqordanyń baspasóz qyzmeti habarlady.

 Қасым-Жомарт Тоқаев: Қастерлі қос мерекенің қатар келуін бәріміз жақсылыққа балаймыз
Фото: Ақорда

Qasym-Jomart Toqaev qasterli qos merekeniń qatar kelýin bárimiz jaqsylyqqa balaıtynyn atap ótti.

– Eń aldymen, qasıetti Ramazan aıynda tutqan orazalaryńyz qabyl bolsyn degim keledi. Sondaı-aq búgin barshańyzdy Áz-Naýryzdyń bastaýy – Kórisý kúnimen quttyqtaımyn! Halqymyz úshin qasterli qos merekeniń qatar kelýin bárimiz jaqsylyqqa balaımyz. Osyndaı berekeli sátte Kókshe jerinde arnaıy bas qostyq. Ulttyq quryltaıdyń kezekti otyrysyn ótkizdik. Mazmundy ári maǵynaly jıyn boldy. Kóptegen salmaqty usynys aıtyldy. Qoǵamdy tolǵandyryp júrgen mańyzdy máseleler kóterildi, - dedi Prezıdent.

Memleket basshysy Quryltaı músheleri azamattyq jaýapkershiliktiń ozyq úlgisin kórsetip júrgenin aıtty.

– Quryltaı otyrysynyń nátıjesi elimizge naqty paıda ákelerine esh kúmán joq. Búgingi jıynda Quryltaı músheleri elge shyn janashyr azamattar ekenin aıqyn kórsetti. Eldik iste kúsh biriktirý – birtutas ultqa tán qasıet. Sizder árdaıym azamattyq jaýapkershiliktiń ozyq úlgisin kórsetip júrsizder. Barshańyzǵa zor rızashylyǵymdy bildiremin, - dedi Memleket basshysy.

Prezıdent Ramazan aıyndaǵy ıgi amaldar yntymaq-birligimizdi arttyra túsetinin atap ótti. 

quryltaı
Foto: Aqorda

– Ramazan aıy – «Aılardyń sultany». Osy kezde azamattarymyz ıgi amaldar jasaýǵa tyrysady. Muqtaj jandarǵa kómektesedi. Iman keltirip, rýhanı jaǵynan tazarady. Túptep kelgende, munyń bári jurtymyzdyń yntymaǵyn arttyrady. Berekeli birligimizdi bekemdeı túsedi. Biz ozyq oıly ult retinde tek alǵa qadam basýymyz kerek. Qazirgi bulyńǵyr, turaqsyz álemde halqymyzdyń tutastyǵy asa mańyzdy. Sondyqtan bárimiz sanaly, sabyrly bolaıyq, aǵaıyn! – dedi Prezıdent.

Qasym-Jomart Toqaevtyń pikirinshe, jan-jaqty reformalar júrgizýde Ulttyq quryltaı erekshe ról atqaryp keledi.

– Halyqqa negizgi saıasatymyzdy durys túsindireıik. Jappaı jurtqa úlgi bolaıyq. El ishindegi daryndy, qabiletti azamattarǵa, eń aldymen, jastarǵa jol bereıik. Biz bir el, bir halyq bolyp, eleýli ózgeristerdi birge jasap jatyrmyz. Qazaqstannyń saıası júıesin tolyq jańǵyrttyq. Jańa ekonomıkalyq baǵdarymyzǵa saı naqty josparymyzdy júzege asyratyn boldyq. Búginde jan-jaqty reformalar óz jemisin berip jatyr. Osy jolda Ulttyq quryltaıdyń erekshe ról atqarǵany sózsiz. Sizderdiń bastamalaryńyz kóptegen máseleni ýaqtyly sheshýge yqpalyn tıgizýde. Bul baǵyttaǵy jumys jalǵasa beredi, - dedi Prezıdent.

Memleket basshysy negizgi maqsat barshaǵa birdeı múmkindik beretin Ádiletti Qazaqstandy qurý ekenin aıtty.

– Men «Ana tili» gazetine bergen suhbatymda elimizdiń aldynda turǵan jańa mindetterdi atap óttim. Negizgi maqsat – barshaǵa birdeı múmkindik beretin Ádiletti Qazaqstandy qurý. Bul – Adal azamattardyń qolynan keletin is. Adal azamatqa tán qasıetter ıslamnyń gýmanıstik ıdeıalarymen tereń astasady. Asyl dinimiz halqymyzdyń bitim-bolmysymen, tanym-túsinigimen bite qaınasyp jatyr. Islam dini ata-babalardan mıras bolǵan salt-dástúrimizben sabaqtas. Osy qos qundylyq, ıaǵnı din men dástúr – ulttyq biregeıligimizdiń myzǵymas tiregi, - dedi Prezıdent.

Prezıdent jastar barsha adamzatqa ortaq qundylyqtardy boıyna sińirip ósýge tıis ekenin atap ótti.

– Dástúrli ıslam – qarańǵylyqtan ada, meıirim men jasampazdyq dini. Ultymyzdyń atadan balaǵa jalǵasqan nanym-senimi adamgershilik qundylyqtarǵa negizdelgen. Solaı bolyp qala beredi. Jurtymyz aq pen qarany, jaqsy men jamandy ajyrata bilýi kerek. Ásirese, jastardyń kózi ashyq, kókiregi oıaý bolǵany jón. Olar jasampazdyq jolymen júrýi qajet. Aǵa býyn óskeleń urpaqqa durys baǵyt-baǵdar berip otyrýy kerek. Jastarymyz barsha adamzatqa ortaq qundylyqtardy boıyna sińirip ósýge tıis. Ulttyq bolmysymyzdy saqtaı otyryp, jańashyldyqqa umtylǵany abzal. Sonda biz úırenetin ári úıretetin ult bolamyz. Qasterli dinimiz de, qazynaly dástúrimiz de osy qasıetterdi dáripteıdi, - dedi Memleket basshysy.

Qasym-Jomart Toqaev órkenıetti el bolý úshin tazalyq uǵymyn qoǵamda tereń ornyqtyrý qajet ekenin aıtty.

– Islam – tazalyqtyń dini. Órkenıetti el bolý úshin tazalyq uǵymy qoǵamda tereń ornyǵýy kerek. Byltyrdan beri elimizde «Taza Qazaqstan» aktsııasy júrip jatyr. Jalpyulttyq joba jurtshylyqtyń keń qoldaýyna ıe boldy. Ásirese, jastarymyz, sonyń ishinde eriktiler erekshe belsendilik tanytty. Ulttyq quryltaı músheleri de ıgi iske atsalysty. «Taza Qazaqstan» jaı naýqan emes ekenin men birneshe ret aıttym. Onyń túpki mazmuny kósheni, aýlany tazalaýmen shektelmeıdi. Bul – ulttyq bolmysymyzǵa qatysy bar másele, tutas elimizdiń kelbetin ózgertetin bastama. Men osy jerde Taza Qazaqstannyń taǵy bir sıpaty azamattarymyzdyń sana-sezimi men jan-dúnıesiniń tazalyǵy ekenin atap ótkim keledi. Rýhanı tazalyq – ult sapasyn aıqyndaıtyn mańyzdy faktordyń biri. Demek, ulttyń jańa sapasyn qalyptastyrýǵa ata dinimiz de oń yqpal etedi, - dedi.

Prezıdent tatý elde turaqtylyq pen tynyshtyq bolatynyn atap ótti.

– Islam – ózara qurmet pen kelisim dini. Qazir álem halqy asa kúrdeli kezeńdi bastan ótkerip jatyr. Qaýip-qaterler kúsheıdi, geosaıası ahýal da kúrdelenip barady. Keıbir sanasyz, nadan adamdardyń, arandatýshylardyń is-áreketiniń saldarynan álemdegi ıslam dininiń de bedeli tómendep ketti. Ókinishke qaraı, osyndaı úrdis paıda boldy. Mundaı almaǵaıyp kezde biz yntymaǵymyzdy nyǵaıtýymyz kerek. Bul – asa mańyzdy mindet. Bárimiz bir el bolyp zor jaýapkershilikpen memlekettik saıasatty qoldaýymyz kerek, elimizdiń ulttyq múddesin qorǵaýymyz qajet. Tatý elde turaqtylyq pen tynyshtyq bolady. Birligi myqty el órkendeıdi. Qasıetti Ramazan aıy elimiz úshin jaqsylyqqa toly, sharapaty mol aı bolsyn. Orazada nıet etken duǵa-tilekterińiz qabyl bolsyn! Elimiz aman, jurtymyz tynysh bolsyn, - dedi Memleket basshysy.

Memleket basshysy Qasym-Jomart Toqaevtyń Ulttyq quryltaıdyń IV otyrysynda sóılegen sózin jarııalaǵan bolatynbyz.

 

 

Сейчас читают