Prezıdent «AgromashHoldıng KZ» aktsıonerlik qoǵamynyń Lokalızatsııa ortalyǵyna bardy
QOSTANAI. KAZINFORM —
Qasym-Jomart Toqaev Qostanaı oblysyna jumys sapary aıasynda «AgromashHoldıng KZ» aktsıonerlik qoǵamynyń Lokalızatsııa ortalyǵyn aralap kórdi, dep habarlaıdy Aqordanyń baspasóz qyzmeti.
Prezıdentke dóńgelekti aýyl sharýashylyǵy tehnıkalary men jalpy mashına jasaý salasy úshin qosalqy bólshekter shyǵaratyn kásiporynnyń jumysy tanystyryldy. Búginde munda 700 adam eńbek etedi. Zaýyt jylyna 250 myńǵa jýyq bólshek óndiredi. Jyl basynan beri zaýyttan 1 myńǵa jýyq traktor men 300 kombaın shyǵarylǵan.
Prezıdentke Lokalızatsııa ortalyǵy CLAAS traktorlary men kombaındarynyń birqatar qosalqy bólshegin daıyndaýǵa tapsyrys alǵany jóninde baıandaldy. Budan bólek, jýyrda aspaly jáne tirkemeli tehnıkalardy óndirýde álemde úzdik sanalatyn AMAZONE kompanııasymen kelisimshartqa qol qoıylady. Bıyl zaýytta dán sebý jáne búrký qondyrǵylarynyń óndirisi de iske qosylmaq.
Memleket basshysyna ortalyq qazirgi ýaqytta KIA kompanııasymen birlesip, 2025 jyly iske qosylatyn jańa zaýyttyń quramdas bólikterine arnalǵan jabdyqtar óndirý jumystaryn bastaǵany týraly málimet berildi.
Qasym-Jomart Toqaev kásiporynnyń eńbek ujymymen júzdesti. Zaýyt jumysshylary Prezıdenttiń Qazaqstan halqyna arnaǵan Joldaýyn zor yqylaspen tyńdaǵanyn, ásirese, jumysshy mamandardyń bedeli arta túsetinine erekshe qýanǵandaryn jetkizdi.
Memleket basshysy ortalyq jumysshylarymen áńgimelesý barysynda óndiristegi jergilikti úlesti arttyrý, bilikti mamandar daıarlaý jáne aýyl sharýashylyǵy tehnıkalaryn jańartý qajet ekenine toqtaldy.
− Elimizde tozyǵy jetken tehnıkalar óte kóp. Keıbir mamandardyń aıtýynsha, ol 80 paıyzǵa deıin jetken. Qazaqstanda shyǵarylǵan tehnıkanyń esebinen barlyq parkti jańartatyn ýaqyt keldi. Qazir kolledjderde jumysshy mamandyqtar boıynsha bilim alǵan jastardyń óndiriske kelgeni qýantady, − dedi Qasym-Jomart Toqaev.
Óz kezeginde zaýyt eńbekkerleri mashına jasaýshylardyń atynan Prezıdentke jumysshy mamandarǵa qoldaý kórsetkeni úshin alǵys aıtty.
Memleket basshysy Qasym-Jomart Toqaev Qostanaı oblysyndaǵy KIA avtomobılderin shyǵaratyn zaýyttyń qurylys alańyna barǵanyn jazǵan edik.
