Qasym-Jomart Toqaev: Kaspıı teńiziniń múshkil háli ekologııalyq apatqa ulasýy múmkin

ASTANA. KAZINFORM — Qasym-Jomart Toqaev «Kópjaqty yntymaqtastyqty damytý, óńirlik qaýipsizdik pen ornyqty damýdy qamtamasyz etý» taqyrybyna arnalǵan «ShYU plıýs» sammıtinde sóılegen sózinde klımat máselesine de erekshe toqtaldy. Bul týraly Aqordanyń baspasóz qyzmeti habarlady. 

– Búgingideı bedeldi forým aıasynda óte shetin, degenmen kúrdeli máselege toqtalǵym keledi. Bul Kaspıı teńiziniń múshkil háli. Jaǵdaı ekologııalyq apatqa ulasýy múmkin. Atalǵan problema ShYU aıasyndaǵy uzaqmerzimdi konsýltatsııanyń basym baǵytyna aınalǵany jón. Osy sebepti búgin Astanada ShYU janynan Sý problemasyn taldaý ortalyǵyn qurý týraly usynys aıttym. Taıaýda Almatyda BUU Bas hatshysynyń qatysýymen Birikken Ulttar Uıymynyń Ortalyq Azııa men Aýǵanstanǵa arnalǵan óńirlik ornyqty damý ortalyǵy ashyldy. Bul bizdiń kópjaqty dıplomatııaǵa beıil ekenimizdi kórsetedi. Oraıly sátti paıdalanyp, barlyq seriktesterge Óńirlik ekologııalyq sammıtti kelesi jyly sáýir aıynda Astanada ótkizý týraly sheshim qabyldanǵanyn habarlaımyn, – dedi Qasym-Jomart Toqaev. 

Memleket basshysy sózin qorytyndylaı kele, kelesi jyly Uıymnyń 25 jyldyǵy atalyp ótetinin eske saldy.

– Bul mańyzdy ári aıtýly beles Jańa altyn dáýirdiń bastaýy bolatynyna senimdimin. Osy kezeńde ShYU óz rólin sózsiz kúsheıtip, zamanymyzdyń eń ózekti máselelerine oń yqpal etetin bolady, – dedi Qasym-Jomart Toqaev.