️Qasym-Jomart Toqaev qarýly qaqtyǵys bolyp jatqan elderge úndeý jasady

TÚRKІSTAN. KAZINFORM — Memleket basshysy Qasym-Jomart Toqaev Túrkistan oblysynyń jurtshylyǵymen kezdesýde sóz sóılep, Taıaý Shyǵystaǵy soǵys ábden shıelenisip ketkenin aıtty, dep habarlaıdy Aqordanyń baspasóz qyzmeti.

— Barshańyzǵa belgili, sońǵy jyldary halyqaralyq geosaıası ahýal asa kúrdeli jáne qubylmaly. Kóptegen elderde qarýly qaqtyǵystar, tipti, soǵystar bolyp jatyr. Bul úderister álem ekonomıkasyna keri áserin tıgizip otyr. Ony biz Taıaý Shyǵystaǵy soǵystan kórip otyrmyz. Soǵys ábden shıelenisip ketti. Menińshe, bul qaqtyǵysta aqyry esh memleket óz paıdasyna qol jetkize almaıdy, — dedi Prezıdent.

Toqaev elimiz qaqtyǵys bolyp jatqan aımaqtyń bir bóligi ekenin aıtty. Prezıdent atap ótkendeı, Qazaqstan bul kúrdeli ahýalda dáneker bolǵysy kelmeıdi, biraq, ózimizdiń jerimizdi beıbit kelissózder úshin usynýǵa daıyn ekenin atap ótti.

— Sondyqtan osy qasterli jerden barlyq elderge halyqaralyq qaýymdastyqqa Úndeý jasaǵym keledi. Eń aldymen, azamattyq, ekonomıkalyq nysandarǵa qarýly shabýyldardy toqtatý kerek. Sodan soń kelissózderdi bastaý kerek. Qazaqstan bul kúrdeli ahýalda dáneker bolǵysy kelmeıdi, biraq, ózimizdiń jerimizdi beıbit kelissózder úshin usynýǵa daıynbyz. Menińshe, Túrkistanda osyndaı kelissózder ótkizýge bolar edi. Alaıda, bul másele qaqtyǵysqa tikeleı qatysyp otyrǵan memleketterge baılanysty. Eń aldymen olar oń sheshim qabyldaýy kerek. Al meniń usynysym bul — qazaq halqynyń izgi nıetiniń kórinisi. Ábden kesh bolmaı turǵanda qarýly is-áreketterdi doǵaryp, kelissózderdi bastaý qajet sııaqty, áıtpese, álemdik ekonomıkanyń daǵdarysqa ushyraýyn aıtpaǵanda, kóptegen halyqtyń beıbit ómiri, tynyshtyǵy buzylady, dúnıe júzindegi turaqtylyqtyń tuǵyry shaıqalady, — dedi Memleket basshysy.

Buǵan deıin Prezıdent ozyq elderdiń negizgi qozǵaýshy kúshin atady.