Qasym-Jomart Toqaev ıýdaızm uıymynyń ókilderimen kezdesti

ASTANA. KAZINFORM – Álemdik jáne dástúrli dinder kóshbasshylarynyń VIII sezi alańynda Qasym-Jomart Toqaev Izraıldiń bas ashkenaz ravvıni Kalman Bermen, Izraıldiń bas sefard ravvıni Davıd Iosefpen, Amerıkanyń iri evreı uıymdary prezıdentteri konferentsııasy atqarýshy tóraǵasynyń orynbasary Malkolm Honlaınmen kezdesti.

Bul týraly Aqordanyń baspasóz qyzmeti habarlady. 

Memleket basshysynyń aıtýynsha, meımandardyń forýmǵa qatysýy elder arasyndaǵy mádenı-rýhanı baılanystardy nyǵaıtýǵa ázir ekenin kórsetedi.

Prezıdent elimizdiń halqy álemniń negizgi dinderin ustanatynyn aıtty. Olardyń arasynda ıýdaızmniń orny erekshe. Al evreı uıymdary qoǵamnyń ajyramas bóligi retinde Qazaqstan halqy Assambleıasyn damytýǵa jáne nyǵaıtýǵa zor úles qosyp keledi.

Qasym-Jomart Toqaev ashkenaz jáne sefard ravvınattarynyń kóshbasshylary adamzatqa ortaq qundylyqtardy ilgeriletý jolyndaǵy dinaralyq dıalogqa belsendi atsalysa beretinine senim bildirdi.

Osyǵan deıin álemdik jáne dástúrli dinder kóshbasshylarynyń sezinde Qasym-Jomart Toqaev forýmnyń bir top qatysýshylaryna memlekettik nagradalardy, Dinaralyq dıalogqa qosqan úlesi úshin Astana halyqaralyq syılyǵyn, Sezdiń qurmet medalin, sondaı-aq Іzgi nıet elshileriniń aıryqsha belgisin tabystaǵany týraly jazdyq.