Qasym-Jomart Toqaev Italııanyń bıznes «kapıtandarymen» dóńgelek ústel otyrysyn ótkizdi
RIM. KAZINFORM – Qazaqstan Prezıdenti Qasym-Jomart Toqaev Rımge resmı sapary aıasynda Italııanyń bıznes-qoǵamdastyq ókilderimen kezdesti. Dóńgelek ústel otyrysyna halyqaralyq deńgeıdegi 30-ǵa jýyq kompanııa qatysty. Bul týraly Aqordanyń baspasóz qyzmetinen málim etti.
Qasym-Jomart Toqaev Italııanyń bıznes «kapıtandaryna» Qazaqstannyń ınvestıtsııalyq múmkindikteri týraly jan-jaqty málimet berdi. Aıtýynsha, álemdegi geosaıası jaǵdaıǵa qaramastan, elimiz aımaqtaǵy eń iri jáne qarqyndy damyp kele jatqan ekonomıkalardyń biri retindegi ornyn senimdi túrde saqtap otyr.
«Byltyr elimizdiń ekonomıkalyq ósimi 5,1 paıyz deńgeıinde boldy. Bul – boljamdy jahandyq kórsetkishke qaraǵanda shamamen 2 ese joǵary. Bizdiń orta merzimdi perspektıvadaǵy strategııalyq maqsatymyz – 2029 jylǵa qaraı ekonomıkanyń kólemin eki ese ulǵaıtýǵa múmkindik beretin 6-7 paıyzdyq ósimge qol jetkizý. Ol úshin aýqymdy reformalar júrgizý qajet edi. Sondyqtan saıası reformalarmen qatar, naryqtyq jáne básekege qabiletti ekonomıkamyzdy aıtarlyqtaı nyǵaıtyp jatyrmyz. Men muny tabysqa jetýdiń qajetti sharty dep esepteımin. Qazaqstanda taıaý arada ekonomıkamyzdyń ashyq, senimdi jáne qarqyndy damýyna yqpal etetin asa mańyzdy ári túbegeıli reformalar bastalady. Muny sizderge senimdi túrde aıta alamyn. Maqsatymyz – Qazaqstandaǵy standarttardy, erejelerdi jáne bıznes júrgizý tájirıbesin Ekonomıkalyq yntymaqtastyq jáne damý uıymynyń deńgeıine jetkizý. Biz eń joǵary halyqaralyq standarttarǵa saı keletin ınvestıtsııalyq ahýal qalyptastyrýǵa umtylyp jatyrmyz», – dedi Memleket basshysy.
