Qasym-Jomart Toqaev Iran Prezıdentiniń qaıtys bolýyna baılanysty kóńil aıtý jedelhatyn joldady

ASTANA. KAZINFORM - Memleket basshysy Iran Islam Respýblıkasynyń Prezıdenti Ibrahım Raısı men úkimettik delegatsııa músheleriniń Shyǵys Ázerbaıjan provıntsııasynda tikushaq apaty saldarynan qaıtys bolýyna baılanysty Qazaqstan halqynyń jáne jeke óziniń atynan osy eldiń Joǵary lıderi Álı Hameneı men Birinshi Vıtse-Prezıdenti Mohammad Mohberge jáne barsha ıran halqyna kóńil aıtty.

– Tikushaq apaty saldarynan Iran Islam Respýblıkasynyń Prezıdenti Ibrahım Raısı men onyń senimdi serikteriniń qaıtys bolǵany týraly sýyt habardy tereń kúızelispen qabyl aldym. Ibrahım Raısı – Iran memleketi men halqynyń ál-aýqatyn arttyrýǵa, múddesiniń muqalmaýyna, aımaqtaǵy turaqtylyqty saqtaýǵa óz ómirin rııasyz arnaǵan kórnekti memlekettik qaıratker. Onyń qolǵa alǵan bastamalary men jetistikteri halyqaralyq qaýymdastyq tarapynan joǵary baǵalanǵany barshaǵa málim. Qazaqstandyqtar Ibrahım Raısıdi parasatty basshy, halyqaralyq deńgeıdegi bedeldi saıasatker, ekijaqty yntymaqtastyqty nyǵaıtýǵa zor eńbek sińirgen tulǵa retinde árdaıym esinde saqtaıdy. Marqumdardyń jatqan jeri jaıly, topyraǵy torqa bolsyn, – dep jazylǵan jedelhatta.