Qasym-Jomart Toqaev Indonezııanyń jańadan saılanǵan Prezıdentine quttyqtaý jedelhatyn joldady

ASTANA. KAZINFORM - Prezıdent Qasym-Jomart Toqaev Prabovo Sýbıanto Djoıohadıkýsýmony Prezıdent saılaýynda jeńiske jetýimen quttyqtady, dep habarlaıdy Aqordanyń baspasóz qyzmeti.

– Sizdiń dana basshylyǵyńyzben ǵajap elińiz óziniń ekonomıkalyq jáne áleýmettik damý jolynda jańa belesterdi baǵyndyryp, halyqaralyq arenadaǵy rólin nyǵaıta túsetinine senimdimin. Qazaqstan men Indonezııa arasynda ózara senim men ortaq múddege negizdelgen tyǵyz qarym-qatynas ornaǵan. Elderimizdiń múddesine saı kópjaqty yqpaldastyqty damytý úshin bar múmkindikti birlese paıdalanýǵa daıyn ekenimdi rastaımyn, – dep jazylǵan jedelhatta.

Memleket basshysy Indonezııa Prezıdentiniń barlyq bastamasy tabysty júzege asyp, halqynyń ósip-órkendeı berýine tilektestik bildirdi.