Qasym-Jomart Toqaev Ilham Álıevpen kezdesti
BІShKEK. KAZINFORM - ShYU sammıti aıasynda ótken kezdesýde Qasym-Jomart Toqaev Ázerbaıjan Respýblıkasynyń Prezıdenti Ilham Álıevke Qazaqstandaǵy aýqymdy saıası reformalar men alǵashqy bir palataly Quryltaı saılaýynyń nátıjesi jóninde áńgimeledi, dep habarlaıdy Aqordanyń baspasóz qyzmeti.
Memleket basshysy eldiń saıası ómirindegi atalǵan tarıhı ýaqıǵa jan-jaqty jańǵyrý jolyndaǵy mańyzdy kezeń sanalatynyn atap ótti. Prezıdent Quryltaı saılaýynyń ótýine baılanysty bildirgen jyly lebizi, sondaı-aq Ázerbaıjan ókilderiniń baıqaýshylar mıssııasy quramyndaǵy belsendiligi úshin Ilham Álıevke alǵys aıtty.
– Elimizdiń tarıhynda bul saılaý tuńǵysh ret halyqaralyq uıymdar tarapynan biraýyzdan oń baǵaǵa ıe boldy. Quryltaı Ázerbaıjan Parlamenti – Mıllı Májilispen belsendi jumys isteýge nıetti. Men óz tarapymnan osy baǵyttaǵy yntymaqtastyqty barynsha qoldaımyn. Memleketaralyq qarym-qatynas oıdaǵydaı damyp keledi. Ózara yqpaldastyqqa qatysty negizgi máselelerdi udaıy nazarda ustaımyn. Osy oraıdaǵy baılanystarǵa kóńil tolady. Bul jetistiktiń negizgi qozǵaýshy kúshi – memleketter basshylarynyń erik-jigeri ekeni sózsiz, – dedi Prezıdent.
Ilham Álıev Qazaqstanda júrgizilip jatqan reformalardyń aýqymy men mán-mańyzyna toqtaldy. Ázerbaıjan Prezıdenti elderimiz arasyndaǵy jan-jaqty yntymaqtastyqty odan ári nyǵaıtýǵa nıetti ekenin jetkizdi.
– Shyn máninde, qarym-qatynasymyz tabysty ilgerilep, odaqtastyq sıpatqa ıe boldy. Kún ótken saıyn naqty mazmunmen tolyǵyp keledi. Quryltaı saılaýynyń tabysty ótýi jáne Qazaqstan halqynyń qoldaýy Sizdiń reformalaryńyz ben bastamalaryńyzdy qoǵam durys qabyldaıtynyn kórsetedi, – dedi Ilham Álıev.
Áńgimelesý kezinde saýda-ekonomıkalyq, ınvestıtsııalyq yqpaldastyq máseleleri, sondaı-aq kólik, logıstıka, energetıka jáne tsıfrlandyrý sııaqty túrli saladaǵy birlesken jobalardyń júzege asyrylý barysy qarastyryldy.
Kezdesý sońynda taraptar aldaǵy halyqaralyq is-sharalar kestesin talqylady.
Aıta keteıik, Qasym-Jomart Toqaev Qyrǵyzstan Prezıdenti Sadyr Japarovtyń shaqyrýymen Shanhaı yntymaqtastyq uıymyna múshe memleketter basshylary keńesiniń 26-otyrysyna jáne «ShYU+» formatyndaǵy kezdesýge qatysý úshin Bishkek qalasyna jumys saparymen barǵan bolatyn.
