Qasym-Jomart Toqaev «HIVA GILAMLARI» kilem toqý fabrıkasyna bardy
ASTANA. KAZINFORM - Qasym-Jomart Toqaev Hıýa qalasyna jumys sapary barysynda Prezıdent Shavkat Mırzıeevpen birge Ózbekstan jeńil ónerkásibindegi úlgili kásiporyndardyń biri sanalatyn «HIVA GILAMLARI» kilem toqý fabrıkasyn aralap kórdi.
Іrgesi 1977 jyly qalanǵan kásiporynǵa jańa ınvestor tolyqtaı rekonstrýktsııa jasaǵan. Munda jylyna 4,2 mıllıon sharshy metr kilem toqıtyn tórt tseh jumys isteıdi.
Memleketter basshylaryna akrılden ıirilgen jip óndirý tsehy, kilem toqý tsehtary jáne daıyn kilem úlgileriniń shoý-rýmy kórsetildi.
Kásiporyn dırektory Kamol Abdýllaevtyń aıtýynsha, fabrıka kilemderi ishki naryqqa satylady, sondaı-aq TMD elderine, QHR men AQSh-qa eksportqa shyǵarylady.
Budan keıin prezıdentter Ózbekstan ónerkásip taýarlarynyń kórmesin tamashalady. Pavılondarda arnaýly tehnıka, elektr tehnıkalyq jabdyqtar úlgileri, baý-baqsha sharýashylyǵynyń selektsııalyq jetistikteri, toqyma, hımııa, tamaq, farmatsevtıka ónerkásibi ónimderi, jibek, teri jáne zergerlik buıymdar kórmege qoıylǵan.
Prezıdentter shekaralas oblystar aýmaǵynda eksportqa baǵdarlanǵan kásiporyndar klasterin qurýdyń mańyzdy ekenin atap ótti.
Sonymen qatar memleketter basshylary Aral teńiziniń tabanyna sekseýil egip, aımaqtaǵy ekologııalyq ahýaldy jaqsartý úshin birlesken kúsh-jiger jumsaý qajet ekenine nazar aýdardy.
Osyǵan deıin Prezıdenttiń jumys saparymen Ózbekstanǵa barǵanyn jazdyq.
