Qasym-Jomart Toqaev Hitachi Construction Machinery kompanııasynyń prezıdentin qabyldady

ASTANA.  KAZINFORM - Qasym-Jomart Toqaev Hitachi Construction Machinery kompanııasynyń prezıdenti Masafýmı Senzakıdi qabyldady. Bul týraly Aqordanyń baspasóz qyzmeti habarlady.

Kezdesý barysynda qazaqstandyq taý-ken kásiporyndarynyń japondyq kompanııamen yntymaqtastyǵyn keńeıtý perspektıvasy qaraldy.
Memleket basshysy Hitachi Construction Machinery kompanııasynyń óńirdegi basty seriktesi sanalatyn Qazaqstan ózara tıimdi baılanystardy tereńdetýge daıyn ekenin atap ótti.

Prezıdenttiń pikirinshe, aldaǵy ýaqytta ken oryndarynyń qajettiligi úshin óndiris lokalızatsııasy men qural-jabdyqtardy jóndeý isine basymdyq berý mańyzdy. 
Qasym-Jomart Toqaev tsıfrlandyrý, «jasyl» tehnologııalardy engizý jáne derbes kólik júıesi birlesken jumystyń perspektıvti baǵyttary bola alady dep sanaıdy.

Masafýmı Senzakıdiń aıtýynsha, kompanııanyń basty maqsaty – jahandyq deńgeıdegi, sonymen birge Qazaqstandaǵy jobalardy júzege asyrý aıasynda joǵary tehnologııaly, tómen kómirtekti, qaýipsiz sheshimder ázirleý ári ony óndiriste qoldaný.

Hitachi Construction Machinery – qurylys jáne taý-ken tehnıkalaryn shyǵaratyn álemdegi jetekshi kásiporyndardyń biri. Kompanııanyń ekskavatorlary, karerge arnalǵan júk kólikteri jáne basqa da tehnıkalary 150-den asa elde, sonyń ishinde Qazaqstandaǵy iri ken oryndarynda jumys isteıdi.

Aıta keteıik, Memleket basshysy Komatsu kompanııasy elimizdiń taý-ken ınfraqurylymyn damytýǵa eleýli úles qosyp kele jatqan senimdi ári ýaqyt tezinen ótken seriktesi sanalatynyn atap ótti.