Qasym-Jomart Toqaev: Halyq Keńesi zań shyǵarý bastamasyna ıe bolady

QYZYLORDA. KAZINFORM – Prezıdent Qasym-Jomart Toqaev V Ulttyq quryltaıda jańadan qurylatyn Halyq keńesi zań shyǵarý bastamasyna ıe bolsyn degen usynys aıtty.

- Halyq Keńesi zań shyǵarý bastamasy quqyǵyna ıe bolýy tıis, bul, árıne, onyń mártebesin aıtarlyqtaı arttyrady. Jylyna keminde bir ret shaqyrylatyn sessııa Halyq Keńesiniń joǵary organy bolady, - dedi Memleket basshysy.

Qasym-Jomart Toqaev Keńeske Qazaqstan halqy Assambleıasynyń etnosaralyq jáne konfessııaaralyq kelisim máseleleri jónindegi bazalyq fýnktsıonaly beriletinin atap ótti.

- Sonymen qatar, jańa organ ishki saıasatty jetildirý baǵytynda usynystar ázirleýge de nazar aýdarady, memlekettik ıdeologııaǵa, sondaı-aq Konstıtýtsııanyń erejelerine jáne memleketimizdiń basqa da mańyzdy qujattaryna qatysty máselelerdi ilgeriletýmen jáne túsindirýmen aınalysady.

Álemdik jáne dástúrli dinder kóshbasshylarynyń sezderin, memlekettik mańyzy bar basqa da gýmanıtarlyq forýmdardy ótkizý fýnktsııasy Keńestiń qaraýyna ótedi.

Halyq Keńesiniń mártebesi men qurylý tártibin Konstıtýtsııadaǵy jeke bólimmen jáne arnaıy Konstıtýtsııalyq zańmen retteý josparlanyp otyr, - dedi Memleket basshysy.

Osyǵan deıin Prezıdent Qazaqstanda jańa konsýltatıvtik organ qurylatyny týraly aıtty.