Qasym-Jomart Toqaev Gýrbangýly Berdimuhamedovpen beıresmı kezdesý ótkizdi
ASTANA. KAZINFORM - Prezıdent Qasym-Jomart Toqaev Túrikmenstan Halk Maslahatynyń Tóraǵasy Gýrbangýly Berdimuhamedovpen beıresmı kezdesý ótkizdi, dep habarlaıdy Aqordanyń baspasóz qyzmeti.
Memleket basshysy mártebeli meımanǵa iltıpat bildirip, elimizdiń rýhanı astanasy, túrki halyqtaryna ortaq qasıetti meken sanalatyn Túrkistan qalasyna saparmen kelgeni úshin rızashylyǵyn jetkizdi.
– Memleketterimiz arasyndaǵy yntymaqtastyqtyń qarqyndy damyp kele jatqany qýantady. Gaz salasynda, sondaı-aq kólik-logıstıka baǵytynda strategııalyq mańyzdy jobalar bar. Biz bul jumystardy baqylaýda ustaımyz. Óıtkeni onyń nátıjesi qazaq-túrikmen ekonomıkalyq baılanystaryn odan ári órkendetýge yqpal etedi, – dedi Prezıdent.
Qasym-Jomart Toqaev Gýrbangýly Berdimuhamedovti Halyqaralyq beıbitshilik jáne senim jylynyń bastalýymen quttyqtady. Onyń aıtýynsha, BUU qoldaǵan bul bastama Túrikmenstannyń álemdik deńgeıdegi abyroı-bedeli joǵary ekenin kórsetedi.
Halk Maslahatynyń Tóraǵasy Memleket basshysyna kıeli Túrkistanda qonaqjaılyq tanytqany úshin alǵys aıtty. Sonymen qatar Qazaqstan Túrikmenstannyń eń negizgi strategııalyq seriktesteriniń biri ekenin jetkizdi.
– Eki el arasyndaǵy saıası, saýda-ekonomıkalyq jáne mádenı-gýmanıtarlyq salalardaǵy qarym-qatynastardyń perspektıvasy mol. BUU aıasynda Halyqaralyq beıbitshilik pen senim jylyn jarııalaý jónindegi Túrikmenstannyń bastamasyna qoldaý bildirgenińiz úshin rızashylyǵymdy bildiremin, – dedi Gýrbangýly Berdimuhamedov.
Kezdesý barysynda ekijaqty qarym-qatynastardyń barlyq baǵyty boıynsha san qyrly strategııalyq seriktestikti nyǵaıtý perspektıvasy talqylandy.
Ózara saýda-sattyq kólemin 1 mıllıard dollarǵa jetkizý úshin baılanystardy damytýdyń tyń múmkindikterin qarastyrý qajettigi atap ótildi.
Gaz salasyndaǵy seriktestikti keńeıtý, naqty aıtqanda, Qazaqstan tarapynyń sheteldik seriktestermen birge Galkynysh ken ornyn ıgerý jobasyna qatysý máselesine mán berildi.
Memleket basshysy «Týrgýndı – Gerat – Kandagar – Spın-Býldak» temir jol qurylysynyń jobasyna nazar aýdaryp, atalǵan joba tabysty júzege assa, kólik baǵyttaryn ártaraptandyrýǵa, eksport naryqtaryn keńeıtýge jol ashatynyn aıtty. Sonymen qatar Soltústik – Ońtústik baǵytyndaǵy tranzıt áleýetin arttyrýda «Qazaqstan – Túrikmenstan – Iran» temir jol magıstraly men qurylysy júrip jatqan «Túrikmenbashy – Garabogaz – Qazaqstan shekarasy» avtokólik joly mańyzdy ról atqarady.
Budan bólek, kezdesýde bilim berý, tsıfrlandyrý salalaryndaǵy ózara tıimdi yqpaldastyq máseleleri talqylandy. Qazaqstan tarapy Túrikmenstanǵa memlekettik qyzmetterdi tsıfrlandyrý, sondaı-aq IT-mamandardyń biliktiligin arttyrý isinde jan-jaqty kómek kórsetýge daıyn ekenin jetkizdi.
Osyǵan deıin Túrkistanda Qasym-Jomart Toqaev pen Gýrbangýly Berdimuhamedovtiń beıresmı kezdesýi ótetini týraly jazdyq.