Qasym-Jomart Toqaev Grek Respýblıkasynyń Prezıdentin Táýelsizdik kúnimen quttyqtady

ASTANA. KAZINFORM - Qasym-Jomart Toqaev Katerına Sakellaropýlýdy jáne grek halqyn ulttyq merekesi – Táýelsizdik kúnimen quttyqtady, dep habarlaıdy Aqordanyń baspasóz qyzmeti.

– Búginde Grekııa Eýropa Odaǵynyń belsendi elderiniń biri retinde óziniń turaqty damý, halyqtyń ál-aýqatyn jaqsartý jáne halyqaralyq qaýymdastyqtaǵy bedelin arttyrý jolynda eleýli jetistikterge qol jetkizip keledi. Osy rette memleketińizdiń ári qaraı qaryshtap damýyna, mereıi árqashan ústem bolýyna tilektespin. Qazaqstan men Grekııa arasyndaǵy mazmundy saıası dıalog pen dástúrli dostyqtan serpin alatyn yntymaqtastyǵymyzdyń aıasy jyldan-jylǵa keńeıip jatqanyn rızashylyqpen atap ótemin. Keleshekte elderimiz arasyndaǵy yqpaldastyq jáne san qyrly baılanystar aýqymy odan ári ulǵaıa túsetinine kámil senemin, – dep jazylǵan jedelhatta.

Qasym-Jomart Toqaev Katerına Sakellaropýlýdyń asa jaýapty qyzmetine tolaǵaı tabys, al dostas Grekııa halqyna qut-bereke tiledi.