Qasym-Jomart Toqaev geosaıası shıelenisterge qatysty Qazaqstannyń ustanymyn málimdedi
ASTANA. KAZINFORM – Qazaqstan men Kıpr prezıdentteriniń kelissózderinde halyqaralyq jáne aımaqtyq máseleler de nazardan tys qalǵan joq. Bul týraly Memleket basshysy Qasym-Jomart Toqaev BAQ-qa málimdemesinde aıtty.
Qazaqstan Prezıdenti jahandyq geosaıası ahýaldyń ýshyǵýyna, qaqtyǵystardyń kóbeıýine báriniń alańdap otyrǵanyn aıtty.
– Álemdegi kóptegen túıtkilge qatysty memleketterimizdiń ustanymy uqsas. Eki el de kez kelgen shıelenis beıbit jáne dıplomatııalyq jolmen sheshilýi kerek degen qaǵıdatty qatań ustanady, – dedi Qasym-Jomart Toqaev.
Búgin Qazaqstan men Kıpr prezıdentteri BUU, EQYU jáne basqa da halyqaralyq uıymdar aıasynda tıimdi jumys isteýge kelisken. Beıbitshilik pen turaqtylyqty qamtamasyz etýge belsene atsalysýǵa ýaǵdalasqan.
– Qazaqstannyń ustanymy boıynsha: barlyq el BUU jarǵysyn, halyqaralyq quqyqtyń negizgi qaǵıdattaryn qatań saqtaýǵa mindetti. Qazaqstan basqa elderdiń aýmaqtyq tutastyǵyn qurmetteıdi jáne búkil álem memleketterin osy qaǵıdatqa basymdyq berýge shaqyrady, – dedi Qasym-Jomart Toqaev.
Aıta keteıik, 2-4 maýsym kúnderi Memleket basshysy Qasym-Jomart Toqaevtyń shaqyrýymen Kıpr Respýblıkasynyń Prezıdenti Nıkos Hrıstodýlıdıstiń Qazaqstanǵa resmı sapary ótedi. Táýelsizdik saraıynda Qasym-Jomart Toqaev Kıpr prezıdentin saltanatpen qarsy aldy.
Buǵan deıin Qasym-Jomart Toqaev Kıpr prezıdentin І dárejeli Dostyq ordenimen marapattady.
Sondaı-aq Qasym-Jomart Toqaev Kıprdegi seriktesterin Transkaspıı jáne Orta dáliz jobalaryna atsalysýǵa shaqyrdy.
