Qasym-Jomart Toqaev Frantsııanyń syrtqy saýda delegat-mınıstri Loran Sen-Martendi qabyldady

ASTANA. KAZINFORM — Memleket basshysy Astana halyqaralyq forýmynyń aıasynda Frantsııa syrtqy saýda delegat-mınıstri Loran Sen-Martenmen, Frantsııa Ulttyq assambleıasy sheteldik ister jónindegi komıssııasynyń prezıdenti Brýno Fýkspen, sondaı-aq EDF, SUEZ jáne Sanofi kompanııalarynyń jetekshilerimen kezdesti. Bul týraly Aqorda habarlady. 

Prezıdent Frantsııa Qazaqstannyń Eýropa Odaǵy elderi arasyndaǵy negizgi saýda jáne ınvestıtsııalyq seriktesi ekenin atap ótti. Sońǵy jyldary ekijaqty saýda kólemi jáne elimizge keletin frantsýz ınvestıtsııasy udaıy artyp keledi. Bul ekonomıkalyq baılanystardy nyǵaıtýǵa taraptardyń ortaq umtylysyn baıqatady. Memleket basshysy osyndaı oń dınamıkany saqtaý qajet ekenin aıtty.

Qasym-Jomart Toqaev 17 kelisimge qol qoıylǵan qazaq-frantsýz bıznes-forýmynyń nátıjesin joǵary baǵalap, ýaǵdalastyqtardy ýaqtyly oryndaýdyń mańyzyna nazar aýdardy.

Áńgimelesý barysynda energetıka, atom ónerkásibi, densaýlyq saqtaý, farmatsevtıka, sý resýrstaryn basqarý jáne basqa da salalarda ózara yqpaldastyqty damytý máseleleri talqylandy. Memleket basshysy oraıly sátti paıdalana otyryp, Frantsııa Prezıdenti Emmanıýel Makronǵa ystyq yqylasyn joldady.

Loran Sen-Marten Astanaǵa 40-tan astam frantsýz kompanııasynyń jetekshileri kelgenin, ártúrli salany qamtıtyn ujymdar elimizben iskerlik baılanystardy ilgeriletýge nıetti ekenin jetkizdi.

Ótken jyldyń qorytyndysy boıynsha Qazaqstan men Frantsııa arasyndaǵy saýda aınalymynyń kólemi 5,5 mıllıard dollarǵa jetti. Bul taýar aınalymynyń 31 paıyzǵa ulǵaıǵanyn kórsetedi. 2005 jyldan 2024 jylǵa deıin Frantsııanyń elimizge quıǵan tikeleı ınvestıtsııa kólemi 20 mıllıard dollardy qurady.