Qasym-Jomart Toqaev eýropalyq seriktesterdi aýyl sharýashylyǵy salasy boıynsha yntymaqtasýǵa shaqyrdy
ASTANA. KAZINFORM - Bul týraly Memleket basshysy Qasym-Jomart Toqaev «Qazaqstan – EO» dóńgelek ústelinde sóılegen sózinde málim etti.
Prezıdent Qazaqstannyń ónerkásip sektory ekonomıkanyń ornyqty ósimi men ártaraptandyrylýyna yqpal etetin berik tirek sanalatynyna nazar aýdardy.
– Sońǵy jyly elimizdiń ІJÓ-degi ónerkásip sektorynyń úlesi shamamen 27 paıyzdy qurady. Biz 190-nan asa jańa óndiris tizbegin iske qostyq. Eýropalyq kompanııalar ónerkásip salalaryn damytýǵa belsendi atsalysyp jatyr. Bul joǵary baǵaǵa laıyq. Qazaqstan men Eýropalyq Odaqtyń ekonomıkalyq yqpaldastyǵy túbegeıli ózgeriske ushyrap, lokalızatsııaǵa jáne qosylǵan quny joǵary óndiris tizbeginiń ıntegratsııasyna basa mán berilýde. Bul mysaldar Qazaqstan-Eýropa ónerkásip kooperatsııasynyń áleýeti zor ekenin kórsetedi. Osy rette eýropalyq qarjy ınstıtýttarynyń, eń aldymen, Eýropalyq qaıta qurý jáne damý banki men Eýropalyq ınvestıtsııalyq banktiń qosqan úlesin erekshe atap ótken jón, – dedi Qasym-Jomart Toqaev.
Prezıdent Alataý «aqyldy qala» jobasy krıptoındýstrııanyń, ınnovatsııanyń jáne joǵary tehnologııalyq bıznestiń órkendeýine jol ashady dep sanaıdy.
Jahandyq azyq-túlik qaýipsizdigi problemasyn sheshý ulttyq kún tártibindegi mańyzdy basymdyqtardyń biri retinde ataldy.
Onyń aıtýynsha, Qazaqstannyń agroónerkásip keshenin joǵary tehnologııalyq sektorǵa aınaldyrý strategııalyq mindet retinde belgilendi. Osy oraıda, Prezıdent eýropalyq seriktesterdi mal sharýashylyǵy, astyq daqyldarynyń selektsııasy, jer ıgerýdiń dálme-dál tehnologııasy jáne topyraq qunaryn arttyrý sekildi salalarda yntymaqtastyq ornatýǵa shaqyrdy.
Sodan soń Memleket basshysy jańa zamandaǵy jasandy ıntellekt róli jónindegi pikirin jetkizdi.
– Goldman Sachs boljamyna sáıkes, JI álem ekonomıkasyna 7 trıllıon dollardan astam tabys ákeledi. Osy jahandyq úderisterge saı, biz aldymyzǵa Qazaqstandy tolyq tsıfrlyq memleketke aınaldyrý jóninde strategııalyq mindet qoıdyq. Jasandy ıntellekt jáne tsıfrlyq damý mınıstrligi quryldy. Bul qurylymǵa qosymsha Jasandy ıntellektini damytý jónindegi keńes jasaqtaldy. Atalǵan konsýltatıvtik organ quramyna jetekshi otandyq jáne álemdik sarapshylar kiredi. Qazaqstan – ınnovatsııa jaǵynan dúnıe júzinde kóshbasshy sanalatyn NVIDIA tehnologııalary negizinde eki sýperkompıýterdi iske qosqan óńirdegi alǵashqy el. Budan bólek, biz «Derekterdi óńdeý ortalyqtarynyń alqabyn» qurdyq. Bul – jahandyq kapıtal men iri tehnologııalyq alpaýyttar úshin tartymdy joba. Alem.ai halyqaralyq ortalyǵynyń janynan Tumo jáne Tomorrow School jańa býyn mektepteri ashyldy. Maqsatymyz – ustazdardyń biliktiligin arttyryp, ınfraqurylymdy jetildirý jáne óskeleń urpaq ıgiligi úshin derbes bilim berý standarttaryn engizý. Sondaı-aq Alataý «aqyldy qalasyn» strategııalyq turǵydan damytýǵa erekshe mán beremiz. Jańa Konstıtýtsııamyzǵa sáıkes, atalǵan qala aıryqsha quqyqtyq mártebege ıe boldy. Bul mańyzdy joba krıptoındýstrııanyń, ınnovatsııanyń jáne joǵary tehnologııalyq bıznestiń órkendeýine jol ashady, – dedi Prezıdent.
Aıta keteıik, osyǵan deıin Qazaqstan EO mańyzdy shıkizat resýrstarynyń tizbesine qosqan 34 mıneraldyń 21-imen qamtamasyz etýge ázir ekeni týraly jazdyq.
