Qasym-Jomart Toqaev Emomalı Rahmonnyń qazaq-tájik yntymaqtastyǵyn damytýdaǵy rólin joǵary baǵalady
ASTANA. KAZINFORM – Qazaqstan Prezıdenti Qasym-Jomart Toqaev Tájikstan Prezıdenti Emomalı Rahmonnyń eki el arasyndaǵy yntymaqtastyqty nyǵaıtýǵa, sondaı-aq Ortalyq Azııadaǵy beıbitshilik pen turaqtylyqty saqtaýǵa qosqan aıryqsha úlesin atap ótti.
Aqordada ótken kelissózde Qasym-Jomart Toqaev Emomalı Rahmonnyń esimi qazirgi Tájikstan tarıhynda erekshe oryn alatynyna toqtaldy.
— Sizge kúrdeli, tipti taǵdyrsheshti deýge bolatyn kezeńde elge jetekshilik jasaý jáne Tájikstandy beıbitshilik, birlik pen jasampaz damý jolyna bastaý syndy zor tarıhı jaýapkershilik júkteldi. Tegeýrindi ári parasatty basshylyǵyńyzben Tájikstan óziniń memlekettiligi men qoǵamdyq kelisimdi nyǵaıtyp, qarqyndy órkendeý jolyna bet aldy. Sondyqtan tájik halqy Sizdiń Otan aldyndaǵy tarıhı eńbegińizdi baǵalap, Ult kóshbasshysy dep ataıdy. Qazaqstan jurtshylyǵy da Sizdi óz halqyna jáne kúlli Ortalyq Azııa elderine ólsheýsiz eńbek sińirgen memleket qaıratkeri sanaıdy. Siz rýhanı negizderimizdi nyǵaıtýǵa, tarıhı jadyny jáne ulttyq mádenı murany saqtaýǵa udaıy kóńil bólip kelesiz. Tájik halqynyń tarıhy men mádenıetin, kórnekti oıshyldar men shaıyrlardyń shyǵarmalaryn nasıhattaý jónindegi bastamalaryńyz zor qurmetke laıyq, — dedi Memleket basshysy.
Qasym-Jomart Toqaev Prezıdent Emomalı Rahmonnyń Qazaqstan men Tájikstan arasyndaǵy san qyrly baılanystardy tereńdetýde aıryqsha ról atqarǵanyna nazar aýdardy.
— Ortalyq Azııanyń turaqtylyǵy men qaýipsizdigin nyǵaıtýǵa qosqan úlesińiz — ólsheýsiz. Barshaǵa málim bedelińiz, baı memlekettik tájirıbeńiz jáne beıbitshilik pen yntymaqtastyq ıdeıasyna degen berik ustanymyńyz bizdiń aımaqtaǵy ózara túsinistik pen senimdi bekitýge septigin tıgizdi. Rýhanı-mádenı qundylyqtardy saqtaýǵa, beıbitshilik pen turaqtylyqty nyǵaıtýǵa, sondaı-aq Qazaqstan men Tájikstan arasyndaǵy dostyq jáne odaqtastyq qatynastardy damytýǵa qosqan eleýli úlesińizdi eskere otyryp, Sizdi, qurmetti Emomalı Sharıpovıch, Qoja Ahmet Yasaui ordenimen marapattaý jóninde sheshim qabyldadym. Bul joǵary nagrada — Qazaqstan halqynyń Sizge jáne baýyrlas tájik eline kórsetken shynaıy qurmetiniń belgisi. Osy rásim elderimizdiń myzǵymas dostyǵynyń taǵy bir jarqyn nyshanyna aınalady dep senemin. Qurmetti Emomalı Sharıpovıch, Sizge sarqylmas kúsh-qýat, jaýapty qyzmetińizge tolaıym tabys tileımin, baýyrlas tájik halqy Sizdiń basshylyǵyńyzben beıbit ómir súrip, órkendeı bersin, — dedi Qazaqstan Prezıdenti.
Aıta keteıik, 5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
Buǵan deıin Qasym-Jomart Toqaev Qazaqstan Tájikstannyń eń iri saýda seriktesteriniń úshtigine engenin málim etti.
Sondaı-aq Qasym-Jomart Toqaev Tájikstan Prezıdentin Qoja Ahmet Yasaui ordenimen marapattady.
