Qasym-Jomart Toqaev Emıne Erdoǵannyń «Zero Waste» jobasyn qoldap, Qazaqstan-Túrkııa dostyǵyn kúsheıtti
ASTANA. KAZINFORM — Prezıdent Túrkııa eliniń Birinshi hanymy Emıne Erdoǵan Birikken Ulttar Uıymy aıasynda asa mańyzdy «Zero Waste» jobasyn usynyp, aýqymdy jumys atqaryp jatqanyna toqtaldy. Bul týraly Aqorda málim etti.
– Osy bastama elimizde júrgizilip jatqan «Taza Qazaqstan» jalpyulttyq jobasymen úndes ekenin erekshe atap ótkim keledi. Sondyqtan biz Emıne hanymnyń asa qajetti jobasyn belsendi túrde qoldaımyz, – dedi Memleket basshysy.
Qasym-Jomart Toqaev Joǵary Mártebeli Rejep Taııp Erdoǵan myrzamen álemdegi ózekti máseleler jóninde pikir almasqanyn aıtty.
– Qazirgideı kúrdeli kezeńde qarýly qaqtyǵystardyń ýshyǵyp turǵanyna alańdaýshylyq bildirdik. Halyqaralyq quqyqtyń jáne ámbebap uıymdar yqpalynyń álsireýi týraly oı bólistik. Birikken Ulttar Uıymynyń rólin kúsheıtý, onyń qararlary men jarǵylaryn qatań saqtaý, halyqaralyq quqyq ústemdigin qamtamasyz etý jáne ádildik qaǵıdatyn ustaný máselesine qatysty ortaq baılamǵa keldik. Barlyq daý-damaılar men janjaldardy dıplomatııalyq kelissózder arqyly beıbit jolmen sheshý qajet ekenin atap óttik. Qazaqstan men Túrkııa aldaǵy ýaqytta da halyqaralyq uıymdar aıasyndaǵy yqpaldastyǵyn jalǵastyra beredi. Biz jahandyq turaqtylyq pen qaýipsizdikti qamtamasyz etý úshin kúsh-jigerimizdi biriktiremiz, – dedi Memleket basshysy.
Qasym-Jomart Toqaev Qazaqstan men Túrkııanyń strategııalyq seriktestigin nyǵaıtý – halyqtarymyzdyń ortaq maqsat-muraty ekenin atap ótti.
– Biz tarıhı tamyry tereń baýyrlastyǵymyzdy keleshek urpaqqa amanat etip, qazirgi san-salaly qarym-qatynasymyzdy nyǵaıta beremiz. Bul qos halyqtyń aldynda turǵan qasıetti paryz dep sanaımyn. Qurmetti Prezıdent myrza! Ardaqty baýyrym, dosym! Ózińizge jáne delegatsııa múshelerine mazmundy kelissózder úshin shyn júrekten alǵys aıtamyn. Yntymaǵymyz arta bersin! Qazaqstan men Túrkııanyń dostyǵy máńgi bolsyn! – dedi Qazaqstan Prezıdenti.
