Qasym-Jomart Toqaev: El Prezıdenti retinde kásipkerlerge shynaıy qurmetpen qaraımyn

ASTANA. KAZINFORM — Memleket basshysy Qasym-Jomart Toqaev «Altyn sapa» jáne «Paryz» syılyǵynyń laýreattaryn marapattaý rásiminde sapaly ónim shyǵaryp, sapaly qyzmet kórsetý — básekege qabiletti bolý jáne eń bastysy, elimizdiń órkendeýine naqty ispen úles qosý degen sóz ekenin atap ótti.

Prezıdent qazirgi geoekonomıkalyq ahýal óte qubylmaly bolyp turǵan kezeńde bıznes ókilderiniń jasampazdyq, otanshyldyq qasıetteri aıqyn kórinetinin alǵa tartty.

— Qazir álemde bolyp jatqan úderisterdi bárińiz de kórip-bilip otyrsyzdar. Geoekonomıkalyq ahýal óte qubylmaly ári bulyńǵyr. Osyndaı kezeńde bıznes ókilderiniń jasampazdyq, otanshyldyq qasıetteri aıqyn kórinedi. Mundaı ýaqytta kásipkerlerimizdiń tabandy eńbegi jáne el bolashaǵyna degen zor senimi asa mańyzdy ekeni anyq. Túptep kelgende, sapaly ónim shyǵaryp, sapaly qyzmet kórsetý — básekege qabiletti bolý jáne eń bastysy, elimizdiń órkendeýine naqty ispen úles qosý degen sóz. El Prezıdenti retinde kásipkerlerge, ulttyq býrjýazııamyzǵa, sonyń ishinde, eń aldymen, osy zalda otyrǵan bıznes qoǵamdastyqtyń ókilderine shynaıy qurmetpen qaraımyn. Sizderdiń qabiletterińizge, iskerlik jáne adamgershilik qasıetterińizge senemin. Sizder memleketimizdiń ıgiligi, ekonomıkalyq áleýeti úshin tabandy eńbek etip kele jatqan Qazaqstannyń naǵyz patrıotysyzdar. Sizder jetistikke jetýden shabyt alatyn, ózgelerge úlgi bolatyn azamatsyzdar. Ár qadamdaryńyz sátti bolatynyna senimdimin. Qandaı da bir iste bolsyn, pessımızmge boı aldyratyn, áreketsiz, qulyqsyz, ishi tar adamdardyń jetistikke jetpeıtini erteden belgili. Muny, ásirese, áleýmettik jelide ýaqytyn ótkizip jatqan jastar bilýi ári este saqtaýy kerek. Shyǵys danalyǵy eń qıyn jaǵdaıdyń ózinde úlken múmkindikter jasyrynyp jatatynyn aıtady. Sondyqtan eńseni túsirip, kúızeliske berilýdiń qajeti joq. Kerisinshe jetistikke jetetin jol izdeý kerek, — dep atap ótti Toqaev.

Osyǵan deıin Memleket basshysy bıyl «Báıterek» holdıngi arqyly ShOB-ty qoldaý kólemi shamamen eki trln teńgege jetkenin aıtqan edi.