Qasym-Jomart Toqaev elordada jol-kólik oqıǵalarynyń kóbeıgenine alańdaýshylyq bildirdi

ASTANA. KAZINFORM - Memleket basshysy Qasym-Jomart Toqaev Astanany damytý jónindegi keńeste sóılegen sózinde bıylǵy on bir aıda Astanada jol-kólik oqıǵasynan 675 bala zardap shegip, bes bala qaza bolǵanyn atap ótti.

-Jalpy, qalada qurylys óte kóp. Kólik sany da az emes. Bul jaǵdaı, bir jaǵynan, turǵyndardyń, ásirese, balalardyń qaýipsizdigine qater tóndirip jatyr. 
Jurt úılerdiń arasynda jaıaý júrginshiler jolaǵy, jyldamdyqty shekteý belgileri joq dep shaǵym aıtady. Munyń qandaı sebeppen bolyp jatqanyn eshkim bilmeıdi.Aýlany jaryqtandyrý máselesi de ózekti. Men ózim bul máselege basa nazar aýdaryp otyrmyn. Ásirese, turǵyn-úıler jáne bilim berý mekemeleriniń mańyndaǵy júk kólikteriniń qozǵalysyn retteý qajet,-dedi Prezıdent. 

Sondaı-aq ol sheshilmeı jatqan taǵy bir másele – kólik turaqtarynyń jetispeýshiligi ekenin atap ótti.

-Bul máseleni retke keltiretin kez keldi. Sheteldiń ozyq tájirıbesin qoldaný kerek. Mysaly, kópqabatty turaqtar salýǵa bolady,-dedi Qasym-Jomart Toqaev. 

Osyǵan deıin Memleket basshysy qaldyqtardy qaıta óńdeýdiń zamanaýı júıesin qalyptastyrýdy jedeldetý kerektigine nazar aýdardy.