Qasym-Jomart Toqaev elimizdiń bas polıtseıi Erjan Sádenovti qabyldady

ASTANA. KAZINFORM - Memleket basshysy Іshki ister mınıstri Erjan Sádenovti qabyldady. 

Erjan Sádenov elimizde «Zań jáne tártip» qaǵıdatyn ornyqtyrý, kez kelgen quqyq buzýshylyqqa múldem tózbeýshilik jaǵdaıyn qalyptastyrý maqsatynda júrgizilip jatqan jumystar jóninde esep berdi. 

Vedomstvo óz qyzmeti barysynda Memleket basshysynyń Іshki ister mınıstrliginiń keńeıtilgen alqa otyrysynda bergen tapsyrmalaryna sáıkes quqyq buzýshylyqtyń aldyn alý jáne azamattardyń quqyqtyq saýatyn arttyrý máselelerine basa mán berip otyrǵanyn baıandady. 

Sonyń nátıjesinde jyl basynan beri qylmys deńgeıi tómendegen, urlyq, tonaý, qaraqshylyq, sondaı-aq otbasylyq-turmystyq jáne kóshede jasalǵan qylmystar, kámeletke tolmaǵan jáne buryn sottalǵan azamattar istegen qylmystar aıtarlyqtaı azaıǵan. 

Іshki ister mınıstri sondaı-aq quqyq buzýdyń aldyn alýǵa baǵyttalǵan biryńǵaı zań ázirleý, turmystyq zorlyq-zombylyqqa qarsy kúres jóninde arnaıy bólimshe qurý úshin qabyldanyp jatqan sharalar týraly málimet berdi. 

Uıymdasqan qylmysqa, esirtki qylmysyna, ekstremızmge qarsy is-qımyl jumystarynyń nátıjesin tanystyrdy.

Kıberqylmysqa qarsy kúres júrgizetin derbes qyzmet qurylatynyn jetkizdi. 

Onyń aıtýynsha, orta býynǵa jatatyn basshylyq quramdy kezekten tys attestattatsııadan ótkizýge daıyndyq júrip jatyr.

Qasym-Jomart Toqaev elimizdegi quqyqtyq tártip pen qoǵamdyq qaýipsizdik deńgeıin odan ári arttyrý jóninde birqatar naqty tapsyrma berdi.