Qasym-Jomart Toqaev elimizdegi reformalardyń basty erekshelikterin atady

ASTANA. KAZINFORM – Aýqymdy ózgerister men ústirt kózqaras eshqashan birge júrmeıdi, bir-birine kedergi bolady. Bul týraly III Strategııalyq seriktester forýmynda Memleket basshysy Qasym-Jomart Toqaev aıtty.

a
Foto: Aqorda

- Reformalarymyzdyń eń basty bóligi — bul Konstıtýtsııanyń qabyldanýy. Azamattarymyz jalpyulttyq referendýmǵa belsendi qatysyp, óz tańdaýyn jasady. Qazaqstannyń jańa Konstıtýtsııasy zańdy kúshine endi. Konstıtýtsııada elimizdiń maqsat-muraty men bolashaqtaǵy beınesi aıqyn kórinis tapty. Qazaqstannyń egemendigi men táýelsizdigi, jerimizdiń tutastyǵy, azamattarymyzdyń zańdy quqyqtary men bostandyqtary memlekettiń qasterli qundylyǵy dep tanyldy, - dedi Memleket basshysy.

Qasym-Jomart Toqaevtyń aıtýynsha, qoǵamda zań men tártipti ornyqtyrý, jalpyulttyq birlikti bekemdeý, halyqtyń ál-aýqatyn arttyrý buljymas qaǵıdat retinde bekitildi. Adam kapıtalyn, bilim men ǵylymdy, ınnovatsııany damytý strategııalyq mindet dep belgilendi.

- Konstıtýtsııa aýqymdy ózgeristerdiń jańa sheshýshi kezeńine jol ashty. Elimizde memlekettik basqarý júıesi túbegeıli jańǵyrdy. Qos palataly Parlamenttiń ornyna bir palataly Quryltaı kelip, qazirgi tańda zań jobalarymen aınalysýda. Jańa mekeme — Qaýipsizdik Keńesiniń apparaty quryldy. Eń joǵary konsýltatıvtik organ — Qazaqstan Halyq Keńesi óz jumysyn bastady, - dedi Prezıdent.

Memleket basshysynyń atap ótýinshe, túbegeıli ózgerister qoǵamnyń barlyq salasynda júrgiziletin boldy.

- Azamattarymyz qazirdiń ózinde reformalardyń oń yqpalyna, ıgiligine kóz jetkizdi. Qazaqstan reformalarynyń ereksheligi — bul aldyn ala daıyndalǵan josparǵa sáıkes ishki temirdeı logıkanyń bolýy, ıaǵnı naqty tártip pen sabaqtastyqtyń saqtalýy. Sebebi aýqymdy ózgerister men ústirt kózqaras eshqashan birge júrmeıdi, bir-birine kedergi bolady. Bul — zańdy nárse. Osylaısha, túbegeıli reformalar júrgizý arqyly Qazaqstan jańa tarıhı ósý, órleý dáýirine qadam basty, - dedi Prezıdent.