Qasym-Jomart Toqaev el turǵyndaryn Qazaqstan halqynyń birligi kúni merekesimen quttyqtady
ASTANA. KAZINFORM – Memleket basshysy Qasym-Jomart Toqaev el turǵyndaryn Qazaqstan halqynyń birligi kúnimen quttyqtady, dep habarlaıdy Aqorda.
Qadirli otandastar!
Qazaqstan halqynyń birligi kúni qutty bolsyn!
Bul – tatýlyq pen tynyshtyqtyń, turaqtylyq pen beıbitshiliktiń sımvoly sanalatyn mereıli mereke.
Qazaq jerin meken etken san alýan etnostyń mádenıeti, dini men dástúri ózara úndesip, biregeı órkenıetke aınaldy. Búginde elimizdiń barsha azamattary birtutas ult bolyp Ádiletti Qazaqstandy quryp jatyr. Yrysty yntymaqtyń arqasynda halqymyzdyń qýaty arta túsedi. Sondyqtan biz birligimizdi nyǵaıtýǵa bar kúsh-jigerimizdi jumyldyrýymyz kerek. Bul – árbir azamattyń mártebeli mindeti ári perzenttik paryzy.
El birligi, ásirese, qıyn-qystaý sátterde synalady. Bıyl biz buryn-sońdy bolmaǵan «alapat tasqynmen» birlese kúresip jatyrmyz. Ár azamattyń bir-birine tileýlestigi arqyly búkil ulttyń tutastyǵyn tanyta bildik. Qazaqstan halqy tarıhtyń kúrdeli kezeńinde jurt bolyp jumylyp, tabysqa jete alatynyn taǵy da dáleldedi.
Halqymyz jasampazdyq pen jańashyldyq, eńbekqorlyq pen bilimpazdyq, janashyrlyq pen jaýapkershilik sııaqty asyl qasıetteriniń arqasynda ósip-órkendeı beredi dep senemin.
Barshańyzǵa zor densaýlyq, tolaǵaı tabys tileımin!
Ár shańyraqqa qut-bereke darysyn!
