Qasym-Jomart Toqaev: El qorǵaý – eń abyroıly mindet
ASTANA. KAZINFORM – Memleket basshysy qazir elimiz aýqymdy ózgeristerdiń sheshýshi kezeńine qadam basqanyna nazar aýdaryp, 15 naýryzda azamattarymyz jalpyhalyqtyq referendýmda Konstıtýtsııaǵa qatysty óz tańdaýyn jasaıtynyn eske saldy.
Qasym-Jomart Toqaev el qorǵaý – eń abyroıly mindet. Naǵyz otanshyl, adal azamattar ǵana osy joldy tańdaıtynyn aıtty.
– Bul – el taǵdyryna tikeleı áser etetin asa mańyzdy sheshim bolmaq. Basty qujattyń jobasynda egemendigimizdi jáne memlekettigimizdi nyǵaıtatyn myzǵymas rýhanı jáne quqyqtyq qundylyqtar bekitildi.
Qazaqstan Respýblıkasynyń aýmaqtyq, ıaǵnı jeriniń tutastyǵy, egemendigi, táýelsizdigi, adam men onyń ómiri, barlyq azamattardyń quqyqtary jáne bostandyqtary eń joǵary qundylyqtar retinde jarııalandy. Jaýapty ári jasampaz otanshyldyq uǵymy aıqyndaldy. Ádiletti Qazaqstan ıdeıasy, Zań jáne tártip qaǵıdaty jańa Konstıtýtsııa jobasynda laıyqty ornyn tapty.
Munyń bárin is júzinde ornyqtyrý – barshaǵa ortaq perzenttik paryz. Túptep kelgende, jańa Ata Zańymyz elimizdiń odan ári damýyna jáne órken jaıýyna jol ashýy kerek. Al kúshtik qurylymdar men arnaıy jasaqtar el táýelsizdigi jáne halyq tutastyǵynyń tiregi bolýǵa tıis. Sebebi aldymyzda turǵan maqsat– bireý. Bul – keler urpaqqa qýatty ári ozyq memleketti amanat etý. Bárimiz bir el bolyp osy tarıhı mıssııany mindetti túrde iske asyramyz. El qorǵaý – eń abyroıly mindet. Naǵyz otanshyl, adal azamattar ǵana osy joldy tańdaıdy. Sizder keleshekte de ult múddesine minsiz qyzmet ete beresizder dep senemin, – dedi Memleket basshysy.
Aıta ketelik Memleket basshysy UAE SWAT Challenge-2026 halyqaralyq jarysynyń jeńimpazdaryn marapattady.