Memleket basshysy: Abaı murasy – shynaıy otanshyldyqtyń qaınar kózi
ASTANA. KAZINFORM — Memleket basshysy Qasym-Jomart Toqaev qazaqstandyqtardy Abaı kúnimen quttyqtady.
Prezıdent quttyqtaýynda uly oıshyldyń shyǵarmashylyq jáne zııatkerlik murasy álemdik ári ulttyq mádenıettiń asyl qazynasynda aıryqsha oryn alatynyn atap ótti.
— Abaı ilimi — rýhanı shamshyraǵymyz, aınymas temirqazyǵymyz. Aqyn jurtshylyqty tolǵandyratyn kókeıkesti máselelerdi búkpesiz aıtyp, halqymyzdy beıqamdyq pen jalqaýlyqtan aýlaq bolýǵa shaqyrdy. Hakimniń «Tolyq adam» ıdeıasy — árbir azamatty rýhanı kemeldenýge úndeıtin jáne eshqashan ózektiligin joǵaltpaıtyn mazmuny tereń tujyrym, — dedi Toqaev.
Memleket basshysy bıylǵy Abaı kúni elimizde júrgizilip jatqan aýqymdy ózgeristermen tuspa-tus kelip otyrǵanyn aıtty.
— Qazaqstannyń Halyq Konstıtýtsııasy zańdy kúshine enip, bıliktiń barlyq ınstıtýttaryn túbegeıli jańǵyrtý úderisi bastaldy. Bul — shyn máninde, uzaq merzimge arnalǵan damý baǵdarymyzdy aıqyndaıtyn erekshe kezeń. Kóp uzamaı el tarıhynda alǵash ret Quryltaı saılaýy ótedi. Bir palataly Parlament reformalardy sapaly ári tıimdi júzege asyrýǵa tyń serpin beretini sózsiz — dedi ol.
Toqaevtyń aıtýynsha, júrgizilip jatqan ózgeristerdiń túpki máni — jasampazdyq qundylyqtaryn azamattardyń sanasyna sińirip, Qazaqstannyń tyń qarqynmen damýyna jol ashý.
— Biz qoǵamda jańa etıkany qalyptastyrý, ulttyq biregeılikti nyǵaıtý jáne gýmanıstik ıdealdardy dáripteý barysynda árdaıym Abaıǵa júginemiz. Uly aqyn halyqtyń bolashaǵy úshin bilimpazdyq, eńbekqorlyq, jaýapkershilik syndy qasıetter óte mańyzdy ekenin uǵyndyrdy, kóregendik tanytyp, jurtty birlik pen kelisimdi saqtaýǵa shaqyrdy, — dedi Memleket basshysy.
Prezıdent Abaı qara sózderiniń taǵylymy qazirgi Qazaqstannyń qundylyqtarymen tolyq úndesetinin atap ótti.
— «Adal Azamat», «Taza Qazaqstan», «Zań men Tártip» tuǵyrnamalyq ıdeıalary — Abaı armandaǵan berekeli qoǵamnyń berik negizi. Sondyqtan, biz Ádiletti, Ozyq ári Qýatty Qazaqstandy quryp jatyrmyz, — dedi ol.
Memleket basshysy uly oıshyldyń mol murasy aldaǵy ýaqytta da óskeleń urpaqty shynaıy otanshyldyq pen týǵan elge súıispenshilik rýhynda tárbıeleý isinde rýhanı azyq bolatynyna senim bildirdi.
Eske salaıyq, buǵan deıin Prezıdent Soltústik Qazaqstan oblysynyń 90 jyldyǵymen quttyqtaǵan edi.
