Qasym-Jomart Toqaev Ekonomıkany yryqtandyrý týraly Jarlyq ázirleýdi tapsyrdy

ASTANA. KAZINFORM – Úkimet 1 aı ishinde Ekonomıkany yryqtandyrý týraly Jarlyqty ázirleýi tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

«Ulttyq kompanııalardy IPO-ǵa shyǵarý máselesin qaıta qaraý óte mańyzdy. Bul iste negizgi maqsat – memlekettik aktıvterdiń tıimdiligin arttyrý. Korporatıvtik basqarýdyń zamanaýı ádis-tásilderin engizý qajet. Sol arqyly kompanııalardyń barynsha ashyq qyzmet etýin qamtamasyz etýge bolady. Úkimet aldaǵy eki jylda aktsııalarynyń edáýir bóligi IPO-ǵa shyǵarylatyn iri nysandardyń naqty tizimin jasaýǵa tıis. Taǵy bir mańyzdy másele. Kvazımemlekettik sektorda aýqymdy reforma jasaý qajet. Qaı jerde memlekettiń úlesi saqtalýy kerek, qaı tusta básekeni damytý qajet degen máseleni birjola sheship alǵan jón. Ásirese, «Samuryq-Qazyna» qoryna kiretin kompanııalarda memlekettiń úlesi basym. Sondyqtan, jumysty solardan bastaý kerek», - dedi Qasym-Jomart Toqaev.

Memleket basshysy qordy túbegeıli saýyqtyrý úshin júıeli ári tyń sharalar qajettigine basa nazar aýdartty.

«Negizgi maqsat – ınvestorlarmen birlese otyryp, iri jobalardy keńinen júzege asyrý arqyly Qordyń ekonomıkalyq qunyn arttyrý. Úkimetke bir aı ishinde Strategııalyq josparlaý jáne reformalar, Básekelestikti qorǵaý jáne damytý agenttikterimen birlese otyryp, Ekonomıkany yryqtandyrý (lıberalızatsııa) týraly Jarlyqty ázirleýdi tapsyramyn. Qujatta úsh baǵytqa basa mán berilýi kerek: naryqtaǵy básekeni arttyrý, jekeshelendirýdi tıimdi júrgizý jáne kvazımemlekettik sektordy reformalaý máseleleri», - dedi Prezıdent.