Qasym-Jomart Toqaev EAEO-nyń saýda-logıstıka salasyna jasandy ıntellektini belsendirek engizýdi usyndy
ASTANA. KAZINFORM – Qazaqstan Eýrazııalyq ekonomıkalyq odaq aıasynda saýda men logıstıka salasyna jasandy ıntellektini belsendi engizýdi qoldaıdy. Bul týraly Memleket basshysy Qasym-Jomart Toqaev V Eýrazııalyq ekonomıkalyq forýmda aıtty.
– Qazaqstan jedel tsıfrlyq transformatsııany sapaly qamtamasyz etý maqsatynda Eýrazııalyq odaq memleketterimen áriptestik pen yntymaqtastyqqa ashyq. Meniń oıymsha, jańa tehnologııalardy, eń aldymen jasandy ıntellektini saýda men logıstıka salasyna engizýdi jandandyrý asa mańyzdy. Kedendik rásimderdi jedeldetý úshin ulttyq tsıfrlyq júıelerdiń ózara yqpaldastyǵyn kúsheıtý qajet, – dedi Qasym-Jomart Toqaev.
Prezıdenttiń aıtýynsha, bul barlyq qujattardy naqty ýaqyt rejıminde jedel óńdeýge, álsiz tustardy anyqtaýǵa jáne júk aǵyndaryn boljaýǵa múmkindik beredi.
Al tsıfrlyq qoltańbalardy ózara taný bıznes shyǵyndaryn edáýir azaıtyp, Eýrazııalyq odaq keńistigindegi saýda kólemin arttyrýǵa yqpal etedi. Jasandy ıntellektiniń taldamalyq áleýetin paıdalaný óndiristik kooperatsııany keńeıtý úshin de úlken praktıkalyq mańyzǵa ıe.
– Elderimizdiń azyq-túlik qaýipsizdigin kúsheıtý úshin agroónerkásiptik keshenge ıntellektýaldy júıelerdi engizýge de basymdyq berý qajet. Menińshe, jańa tehnologııalardy belsendi ári jan-jaqty qoldaný EAEO-ǵa múshe memleketterdiń qarqyndy ekonomıkalyq ósimin qamtamasyz etetin mańyzdy faktorǵa aınalady. Sonymen birge jańa tehnologııalar EAEO músheleri arasyndaǵy tsıfrlyq alshaqtyqtyń sebebi ne kózine aınalmaýy kerek. Kerisinshe, olar elderimizdiń ekonomıkalyq ózara baılanysyn kúsheıtetin jáne yntymaqtastyqtyń qýatty sınergııasyn qalyptastyratyn qural bolýy qajet, – dedi Qazaqstan prezıdenti.
Búgin Q. Toqaevtyń 2025 jylǵy jeltoqsanda kótergen bastamasy negizinde Jasandy ıntellektini jaýapty damytý týraly birlesken málimdemeni qabyldady. Qujattyń basty maqsaty – odaqqa qatysýshy elderdiń ekonomıkanyń negizgi salalaryn tsıfrlandyrýǵa qatysty ortaq ustanymdaryn bekitý, ózara múddelerdi eskere otyryp, JI tehnologııalaryn qaýipsiz engizýdi qamtamasyz etý.
– Osy múmkindikti paıdalanyp, EAEO-ǵa múshe memleketterdiń basshylaryna osy mańyzdy qujatty ázirleý men qabyldaýǵa qoldaý kórsetkeni úshin alǵysymdy bildiremin. Jańa tehnologııalyq jáne ekonomıkalyq qurylym negizinde álemdik tártiptiń qaıta qalyptasýy kezeńi bizdiń elderimizge biregeı múmkindikter terezesin ashyp otyr. Bul múmkindikterdi bolashaq jańa álemdegi ustanymymyzdy nyǵaıtý úshin tıimdi paıdalaný qajet. Biz osy tarıhı múmkindikti birlesip ári tolyq kólemde paıdalanýǵa mindettimiz, – dedi Memleket basshysy.
Aıta keteıik, búgin elordada Memleket basshysy Qasym-Jomart Toqaevtyń qatysýymen V Eýrazııalyq ekonomıkalyq forýmnyń (EEF-2026) plenarlyq otyrysy ótip jatyr. Forým taqyryby «Jahandyq tsıfrlyq básekedegi EAEO: jasandy ıntellektige basymdyq berý» dep atalady.
Bul jıynǵa Reseı Prezıdenti Vladımır Pýtın, Qyrǵyzstan Prezıdenti Sadyr Japarov, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan, Kýba Respýblıkasynyń vıtse-prezıdenti Salvador Valdes Mesa, Vetnam Premer-mınıstriniń orynbasary Ho Kýok Zýng, Mońǵolııa Premer-mınıstriniń orynbasary Nıamtaıshıryn Nomtoıbaıar, Eýrazııalyq ekonomıkalyq komıssııa alqasynyń tóraǵasy Baqytjan Saǵyntaev jáne taǵy da basqa laýazymdy resmı tulǵalar keldi.
