Qasym-Jomart Toqaev EAEO elderine tsıfrlyq kólik dálizderiniń ekojúıesin qurýdy usyndy
ASTANA. KAZINFORM – Eýrazııa keńistigindegi kólik-logıstıka ınfraqurylymyn tsıfrlandyrý jahandyq saýda baılanystaryndaǵy mańyzdy róldi saqtaýǵa yqpal etedi. Bul týraly Memleket basshysy Qasym-Jomart Toqaev Joǵary Eýrazııalyq ekonomıkalyq keńestiń otyrysynda aıtty.
Prezıdenttiń aıtýynsha, Eýrazııanyń kólik jelisi Azııa, Eýropa jáne Taıaý Shyǵystyń negizgi naryǵyn baılanystyratyn halyqaralyq baǵyttardyń joǵary tehnologııalyq júıesi sanalady. Áńgime jalpy uzyndyǵy 50 myń shaqyrymnan asatyn tarmaqtalǵan tranzıttik dálizder jelisi týraly bolyp otyr. Onyń 10 myń shaqyrymnan astamy Qazaqstan aýmaǵy arqyly ótedi.
– Jahandyq saýda-ekonomıkalyq baılanystar júıesindegi mańyzdy róldi saqtap qalý úshin barshamyzǵa transshekaralyq ınfraqurylymdy tsıfrlandyrýdy odan ári damytý qajet bolady. Ikemdi logıstıkalyq sheshimder, turaqty jetkizilimder jáne júkterdiń jyldam ótýi Eýrazııalyq ekonomıkalyq odaqtaǵy tranzıttik aǵyndar kólemin edáýir arttyrýǵa múmkindik beredi. Sondyqtan ótken jyldyń sońynan bastap biz «bir tereze» qaǵıdaty boıynsha jumys isteıtin Smart Cargo quralyn júıeli túrde engizip kelemiz. Bul platforma aıasynda kólik dálizderin tsıfrlandyrý jumystary júrgizilip jatyr, – dedi Qasym-Jomart Toqaev elordada Táýelsizdik saraıynda ótken otyrysta.
Sonymen birge, Qazaqstanda kórshiles eldermen elektrondy ruqsat blankilerimen almasý tetigi engizildi.
– Odaq aıasyndaǵy aqparattyq júıelerdiń ózara ıntegratsııasy – ýaqyt talaby. Osyǵan baılanysty Eýrazııalyq ekonomıkalyq komıssııanyń ulttyq servısterdiń tsıfrlyq vıtrınasyn qurý jónindegi jumysy asa ózekti. Meniń oıymsha, biz bul protsesterdi jedeldetip, Odaqta tsıfrlyq kólik dálizderiniń tolyqqandy ekojúıesin qalyptastyrýdy qamtamasyz etýimiz qajet. Osy baǵyttaǵy kúsh-jigerdi biriktirý Eýrazııanyń joǵary tehnologııalyq kólik habtaryn qurýǵa múmkindik beretinine senimdimin, – dedi Memleket basshysy.
Aıta keteıik, Astanada Joǵary Eýrazııalyq ekonomıkalyq keńestiń otyrysy bastaldy. Bul jıynǵa Qyrǵyzstan Prezıdenti Sadyr Japarov, Reseı Prezıdenti Vladımır Pýtın, Belarýs Prezıdenti Aleksandr Lýkashenko, Armenııa vıtse-premeri Mger Grıgorıan keldi.
Bıyl Qazaqstan Respýblıkasy EAEO organdaryna tóraǵalyq etip otyr.
Memleket basshysy Qasym-Jomart Toqaev 2025 jylǵy 31 jeltoqsanda EAEO memleketteri basshylaryna joldaǵan úndeýinde Qazaqstan tóraǵalyǵynyń negizgi basymdyqtaryn aıqyndady.
Olar – jasandy ıntellektini ekonomıkalyq ıntegratsııany damytýdyń jańa quraly retinde damytý, EAEO logıstıkalyq keńistiginiń áleýetin paıdalaný, ónerkásip pen agroónerkásip keshenin tsıfrlandyrý, ózara saýdadaǵy ákimshilik kedergilerdi qysqartý jáne úshinshi eldermen ekonomıkalyq yntymaqtastyqty keńeıtý.
