Qasym-Jomart Toqaev Dúnıejúzilik dopıngke qarsy agenttik prezıdenti Vıtold Bankany qabyldady
Prezıdent Qasym-Jomart Toqaev Dúnıejúzilik dopıngke qarsy agenttik sporttaǵy dopıng problemasymen kúresetin jahandyq ınstıtýt retinde negizgi ról atqaratynyna nazar aýdardy. Sondaı-aq Vıtold Bankanyń Astanaǵa sapary Qazaqstan men WADA arasyndaǵy yntymaqtastyqty keńeıtýde mańyzdy qadam sanalatynyn jetkizdi.
Qasym-Jomart Toqaev júıeli túrde tártip buzýshylarmen kúresý jáne taza sporttyń biryńǵaı standarttaryn qoldaý máselesindegi agenttiktiń berik ustanymyna joǵary baǵa berdi. Bul sportshylarǵa ǵana emes, álemdegi mıllıondaǵan jankúıer úshin de óte ózekti.
Búginde Qazaqstannyń Týrızm jáne sport mınıstrligi janynan dopıngke qarsy synamalar zerthanasy jumys isteıdi. Bul – Ortalyq Azııadaǵy osy tektes jalǵyz mekeme. Zerthana bazasynda Óńirlik dopıngke qarsy uıym qyzmet etedi. Onyń quramyna Qazaqstan, Ózbekstan, Qyrǵyzstan, Tájikstan, Túrikmenstan, Pákistan, Mońǵolııa jáne Aýǵanstan sekildi elder kiredi.
WADA prezıdenti Qazaqstannyń agenttik bastamalaryn qoldaǵany úshin rızashylyǵyn bildirip, elimizdiń sport qurylymdarymen yqpaldastyq deńgeıi joǵary ekenin atap ótti.
Qasym-Jomart Toqaev pen Vıtold Banka uzaq merzimdi yntymaqtastyqty jalǵastyrý, Dúnıejúzilik dopıngke qarsy agenttiktiń jaýapty ári senimdi seriktesi retindegi Qazaqstannyń mártebesin odan ári nyǵaıtý nıetin rastady.
Aıta keteıik, keshe Prezıdent «Lýkoıl» kompanııasynyń mereıtoılyq is-sharasyna qatysty.