Qasym-Jomart Toqaev Digital Bridge forýmy aıasynda ótken kórmege bardy
Qasym-Jomart Toqaev Digital Bridge halyqaralyq tehnologııalyq forýmy aıasynda uıymdastyrylǵan kórmege bardy, dep habarlaıdy Kazinform.
Memleket basshysy dástúrli Digital Bridge halyqaralyq tehnologııalyq forýmy aıasynda uıymdastyrylǵan robotty tehnıka, Social Tech, Creative Economy, AI, FinTech, Industry 4.0, GovTech taqyryptyq kórme aımaqtaryn, sondaı-aq Kaspikz, Qarjy naryǵyn retteý jáne damytý agenttigi, Astana Hub, Freedom Bank, MyCar jáne taǵy da basqa uıymdardyń kórme stendterin aralap kórdi.
Robotty tehnıka aımaǵynda Memleket basshysy kóptegen jarystarda jeńimpaz atanǵan robotty tehnıkadan Qazaqstan quramasynyń múshelerimen áńgimelesti jáne Ustem Foundation, Alem School, MakerSpace jobalarymen tanysty.
Tsıfrlyq damý, ınnovatsııa jáne aeroǵarysh ónerkásibi mınıstri Baǵdat Mýsın Prezıdentke jekelegen ekinshi deńgeıli bankter men kompanııalar ózderiniń platformalary arqyly azamattardyń memlekettik qyzmetterge qol jetkizýine múmkindik jasap otyrǵanyn baıandady.
Memleket basshysyna densaýlyq saqtaý salasyn tsıfrlandyrý jumystary, sonyń ishinde Densaýlyq saqtaý mınıstrliginiń «QR arqyly dárigerdiń qabyldaýyna jazylýdy rastaý» (eGov mobile qosymshasyndaǵy eDensaýlyq) jobasy tanystyryldy.
Sonymen qatar Prezıdentke Astana Hub jobalary, Google for Startups, Draper University, Tech Orda, Silkroad innovation hub, óńirlik IT Hub baǵdarlamalarynyń júzege asyrylý barysy jóninde málimet berildi. «Ulttyq aqparattyq tehnologııalar» AQ jasandy ıntellekt negizinde keńes berip, memlekettik qyzmet túrlerin kórsetetin «AiGov» chat-boty jobasyn kórsetti.
Munan soń Qasym-Jomart Toqaevqa «QazaqGaz» ulttyq kompanııasynyń tsıfrlyq sheshimderi jáne «QazMunaıGaz» AQ-nyń kólik qaýipsizdigin qamtamasyz etýge, sondaı-aq kólik pen arnaıy tehnıka jumysyna ashyq monıtorıng júrgizýge arnalǵan «Saparlardy basqarý» jobasy týraly aıtyldy.
Memleket basshysy kórmege qatysýshylarǵa ózderiniń tsıfrlyq jobalaryn tabysty júzege asyrýyna tilektestik bildirdi. Prezıdent elimizdegi tsıfrlandyrý úrdisi tek bir salany ǵana jetildirýge emes, sonymen qatar jalpy ekonomıkamyz ben qoǵam ómirinde eleýli ózgerister jasaýǵa baǵyttalǵanyn atap ótti.
