Qasym-Jomart Toqaev: Dıalog joq jerde, qarsylyq pen túsinispeýshilik týyndaıdy

ASTANA. KAZINFORM – Almaǵaıyp zamanda strategııalyq baǵdarǵa saı áreket etý – Qazaqstan halqynyń aldynda turǵan asa mańyzdy mindet. Prezıdent Qasym-Jomart Toqaev Qazaqstan halqy Assambleıasynyń HHHІV sessııasynda osyndaı paıym aıtty.

- Berekesizdikke boı aldyrmaý úshin álemdik qaýymdastyq múddeler toǵysatyn tusty izdeýge, kúrdeli sheshimder qabyldaýǵa jáne amalsyz mámileler jasaýǵa májbúr bolady. Dıalog joq jerde, qarsylyq pen túsinispeýshilik týyndaıdy. Qazirgi syn-qaterlerdi aýqymdy halyqaralyq yqpaldastyq arqyly ǵana jeńe alamyz dep senemin. Ózara bite qaınasqan álemde ǵalamdyq máselelerdi sheshýdiń budan basqa joly joq. Sondyqtan pragmatızm men ózara qurmetke, teńdikke, ádildikke, eshkimdi alalamaýǵa negizdelgen syndarly kelissózder men turaqty baılanystar halyqaralyq jaǵdaıdy ońaltyp, shıelenisterdiń túıinin tarqatady, - dedi Prezıdent.

Memleket basshysynyń paıymdaýynsha, qazir búkil álemniń bolashaǵy bulyńǵyr bolyp tur.

- Osy almaǵaıyp zamanda strategııalyq baǵdarymyzǵa saı áreket etý – aldymyzda turǵan asa mańyzdy mindet. Biz qolǵa alǵan aýqymdy jobalardy júzege asyra beremiz. Elimizge ınvestıtsııa tartyp, ónerkásip salasyndaǵy áleýetimizdi arttyramyz. Biz qazirgi ahýaldy eskere otyryp, uzaq merzimge arnalǵan maqsattarymyzǵa qol jetkizý úshin tııanaqty ári tıimdi jumys isteýimiz kerek, - dedi Qasym-Jomart Toqaev.

Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr. 

Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».