Qasym-Jomart Toqaev China Communications Construction Company prezıdentin qabyldady
ASTANA. KAZINFORM — Qasym-Jomart Toqaev China Communications Construction Company prezıdenti Chjan Bınnandi qabyldady.
Aqordanyń baspasóz qyzmetiniń habarlaýynsha, kezdesýde elimizdiń kólik-logıstıkalyq jáne energetıkalyq áleýetin nyǵaıtý turǵysynan strategııalyq mańyzǵa ıe birlesken jobalardy júzege asyrý barysy talqylandy.
Memleket basshysy Qazaqstanda biraz jyldan beri jumys istep, kúrdeli ınfraqurylymdyq sheshimderdi tabysty iske asyrǵan SSSS kompanııasy búginde senimdi ári kásibı seriktes retinde tanylǵanyn aıtty.
Prezıdent Baqty — Aıagóz temirjol qurylysynyń strategııalyq mánine nazar aýdardy. Bul jeli Qazaqstan men Qytaı arasyndaǵy júk tasymalyn aıtarlyqtaı ulǵaıtýǵa múmkindik beredi.
Budan bólek, Kaspıı teńiziniń tabanyn tereńdetý jumystaryn júrgizý úshin birlesken kásiporyn qurýdyń mańyzy atap ótildi.
Memleket basshysy birlesken kásiporyn Kaspıı mańy elderi men odan tysqary jerlerde qaýipsiz teńiz qatynasyn qamtamasyz etý qyzmetin usynatyn óńirlik ortalyq qalyptastyrýǵa septigin tıgizetinine senim bildirdi.
Áńgimelesý barysynda energetıka salasyndaǵy keleshegi zor bastamalar talqylandy.
Qasym-Jomart Toqaev osy sapar aıasynda Qazaqstandaǵy alǵashqy gıdrojınaqtaýshy elektr stantsııasy qurylysynyń jobasyn birlese ázirleý týraly kelisimge qol qoıylýyn quptady.
Memleket basshysynyń aıtýynsha, bul nysan ulttyq energııa júıesin nyǵaıta túsedi.
Qýattylyǵy 600 MVt bolatyn gıdrostantsııany SSSS kompanııasyna enshiles China International Water & Electric Corporation kásipornynyń qatysýymen Almaty oblysyndaǵy Qarǵaly ózeninde salý josparlanyp otyr.
Eske salaıyq, buǵan deıin Prezıdent Qasym-Jomart Toqaev Contemporary Amperex Technology Co. Ltd. (CATL) dırektorlar keńesiniń teńtóraǵasy Pan Tszıanmen joǵary tehnologııa salasyndaǵy uzaqmerzimdi yntymaqtastyq perspektıvasyn talqylaǵanyn habarlaǵanbyz.
