Qasym-Jomart Toqaev BUU minberinen elimizdiń ekonomıkasynyń negizgi baǵyttaryn atady
NЬıÝ-IORK. KAZINFORM — BUU Bas Assambleıasy 80-sessııasynyń Jalpy debatynda sóz sóılegen Memleket basshysy Qasym-Jomart Toqaev elimizdiń ekonomıkasynyń negizgi baǵyttaryn atady.
— Qazaqstan ekonomıkasy turaqty damyp keledi. Bıyl ekonomıkalyq ósim 6 paıyzdan asady dep kútilýde. Bul bizdiń aımaqtaǵy eń iri ekonomıkanyń ornyqtylyǵyn qýattaı túsedi. Degenmen bul jetistikterge toqmeıilsýge bolmaıdy. Biz uzaq merzimdi damýǵa baǵyttalǵan kúsh-jigerdi jalǵastyramyz. Qazaqstannyń energetıkalyq strategııasy tórt salaǵa negizdelgen: munaı-gaz, kómir, ýran jáne asa mańyzdy mıneraldar. Bul qundy resýrstar senimdi energetıkalyq seriktestiktiń negizi bola alady, — dedi Prezıdent.
Memleket basshysynyń atap ótýinshe, klımat ózgerisi men «jasyl» kún tártibin kómir keni sekildi orasan zor energetıkalyq resýrsqa baı elder qabyldaı bermeıdi. Óıtkeni búginde ozyq tehnologııanyń arqasynda ony tazalanǵan kúıinde paıdalanýǵa bolady.
— Sondyqtan biz 35 jyl ishinde elimizdi dekarbonızatsııalaý jóninde mindetteme aldyq. Tek jańartylatyn energııa kómegimen búkil energetıkalyq máseleni sheshý múmkin emes. Aýyl sharýashylyǵy — álemdik naryqta zor áleýetke ıe jetekshi salamyzdyń biri. Qazaqstannyń astyq eksportyndaǵy áleýeti — 12 mıllıon tonna. Bul halyqaralyq naryqtyń basym bóligin qamtıdy jáne kólik baılanystaryn jaqsartý esebinen saýdany keńeıtýdiń jańa múmkindikterine jol ashady. Biz syrtqy saýdamyzdyń ınklıýzıvtiligi men ornyqtylyǵyn qamtamasyz ete otyryp, ony odan ári ártaraptandyrý maqsatynda barlyq negizgi halyqaralyq seriktesterimizben jáne aımaqtaǵy múddeli eldermen yntymaqtastyqty jalǵastyramyz, — dedi Qasym-Jomart Toqaev.
Memleket basshysy Jalpy debat barysynda BUU-ny jańǵyrtýdy kózdeıtin batyl áreket Qaýipsizdik keńesin reformalaýdan bastalýy tıistigine de basa nazar aýdartty.
Sonymen qatar Toqaev Bas Assambleıaǵa 22 sáýirdi Halyqaralyq jer sharyn kógaldandyrý kúni dep jarııalaıtyn qarar qabyldaýdy usyndy.