Qasym-Jomart Toqaev: BUU — beıbitshilik pen damýdyń balamasyz qurylymy

ASTANA. KAZINFORM — Qazaqstan Prezıdenti BUU-nyń joǵary ókilderimen kezdesý ótkizdi, dep habarlaıdy Aqordanyń baspasóz qyzmeti.

Memleket basshysy BUU Bas hatshysynyń orynbasary — BUU Bas hatshysynyń tsıfrlyq máseleler jáne ozyq tehnologııalar jónindegi arnaýly ókili Amandıp Sıngh Gıllmen, BUU Bas hatshysynyń orynbasary — BUU Damý baǵdarlamasy Ákimshisiniń orynbasary Haolıan Shýmen, BUU Bas hatshysynyń Aýǵanstan boıynsha arnaıy ókili jáne Aýǵanstanǵa kómektesý jónindegi BUU mıssııasynyń basshysy Roza Otynbaevamen, BUU Bas hatshysynyń jastar isi jónindegi kómekshisi Felıpe Paýlermen kezdesti.

Qasym-Jomart Toqaevtyń aıtýynsha, Astana halyqaralyq forýmyna BUU-nyń bedeldi ókilderiniń qatysýy san qyrly ári syndarly dıalogtyń barshaǵa ortaq ekenin kórsetedi.

Qazaqstan Prezıdenti geosaıası turaqsyzdyq beleń alǵan kezeńde BUU óziniń ámbebap ári balamasyz sıpatyn saqtap, beıbitshilik, qaýipsizdik jáne damýdy qamtamasyz etý isindegi biregeı Uıym retinde qala beretinine senim bildirdi.

Buǵan deıin habarlanǵandaı, Memleket basshysy BUU Azyq-túlik jáne aýyl sharýashylyǵy uıymynyń (FAO) bas dırektory Tsıýı Dýnıýımen kezdesti.