Qasym-Jomart Toqaev: BUU áli de ámbebap ári balamasy joq uıym
ASTANA. KAZINFORM – Qasym-Jomart Toqaev BUU Bas hatshysy Antonıý Gýterrıshpen telefon arqyly sóılesti, dep habarlaıdy Aqordanyń baspasóz qyzmeti.
Áńgimelesý barysynda Qazaqstan men Birikken Ulttar Uıymy arasyndaǵy yqpaldastyqtyń ózekti máseleleri talqylandy.
Prezıdent Almatyda Ortalyq Azııa men Aýǵanstan úshin Ornyqty damý maqsattary jónindegi aımaqtyq ortalyq qurý týraly BUU Bas Assambleıasy biraýyzdan qabyldaǵan qarardyń mańyzyn atap ótti. Sondaı-aq Aımaqtyq ortalyqtyń ınstıtýttyq negizin jasaqtaý boıynsha atqarylatyn jumystar talqylandy.
Qasym-Jomart Toqaev bıyl qurylǵanyna 80 jyl tolǵan BUU-nyń áli de ámbebap ári balamasy joq uıym sanalatynyn jetkizdi. Sonymen qatar memleketterdiń barlyǵy qurylym Jarǵysy men álem elderi moıyndaǵan halyqaralyq quqyq qaǵıdattaryn saqtaýǵa tıis dep sanaıdy.
Bas hatshy Qazaqstannyń bitimgershilik kúsh-jigerine, jahandyq qaýipsizdikti nyǵaıtýǵa jáne ornyqty damýdy ilgeriletýge qosqan úlesin joǵary baǵalady.
Osyǵan deıin BUU-nyń Bas Assambleıasy uıymnyń aımaqtyq ortalyǵyn Almatyda ashý týraly qarar qabyldaǵany týraly jazdyq.