Qasym-Jomart Toqaev Birikken Ulttar Uıymyn reformalaýǵa shaqyrdy
ASTANA. KAZINFORM – Qasym-Jomart Toqaev Birikken Ulttar Uıymyn reformalaý máselesine jaýapkershilikpen qaraýǵa shaqyrdy. Bul týraly Aqordanyń baspasóz qyzmeti habarlady.
Sonymen qatar Qaýipsizdik Keńesi turaqty músheleriniń ustanymyn Uıymdaǵy daǵdarystyń basty sebepteriniń biri retinde atady.
– Birikken Ulttar Uıymyn reformalaý týraly aıtqanda, barynsha pragmatıkalyq kózqaras ustanýymyz kerek dep sanaımyn. Áıtpese, aldaǵy ýaqytta da jolaıryq, strategııalyq qundylyqtar men basqa máseleler jaıynda aıta beremiz. Biz jahandyq, óńirlik kezdesýler, konferentsııalar men túrli jıyndar ótkizemiz. Qazaqstan jáne Túrkııa sııaqty orta derjavalardyń mańyzy men oń yqpalyn atap ótkim keledi. Árıne, álemde bizge eshkim teń kelmeıdi dep maqtanýdan aýlaqpyn. Biraq jahandyq úderisterde joǵary deńgeıde jaýapkershilik tanytyp júrmiz. Muny dıplomatııalyq is-áreketimiz kórsetip otyr. Sondyqtan jahandyq máselelerdiń sheshimine jıi qarsy keletin Qaýipsizdik Keńesindegi iri derjavalardan góri orta derjavalardyń jaýapkershiligi joǵary desek, artyq bolmaıdy, - dedi Memleket basshysy.
Kelesi suraqty qoıar aldynda Mevlıýt Chavýshoǵly Qasym-Jomart Toqaevtyń dıplomatııadaǵy tájirıbesiniń mol ekenine nazar aýdardy.
– Prezıdent Toqaev – halyqaralyq júıeni, sonyń ishinde Birikken Ulttar Uıymyn óte jaqsy biletin álemdik kóshbasshylardyń biri. Ol BUU Bas hatshysynyń orynbasary laýazymynda qyzmet etkenin bilesizder. Sol ýaqytta men Eýropa Keńesi Parlamenttik assambleıasynyń tóraǵasy boldym. Qasym-Jomart Toqaev baýyrlas Qazaqstan halqynyń ıgiligi jolynda aıanbaı eńbek ete júrip, halyqaralyq júıeniń tıimdiligin barynsha arttyrýǵa úles qosyp keledi, - dedi moderator.
Buǵan deıin Memleket basshysynyń Antalııa dıplomatııalyq forýmynyń paneldik sessııasyna qatysqanyn habarlaǵan edik.
