Toqaev toǵyz eldiń jańa elshisine Qazaqstannyń beıbit saıasat ustanymyn tanystyrdy
ASTANA. KAZINFORM – Astanadaǵy Táýelsizdik saraıynda Qazaqstan Prezıdentine toǵyz eldiń tótenshe jáne ókiletti elshileriniń senim gramotalaryn tabystaý rásimi ótti, dep habarlaıdy Aqordanyń baspasóz qyzmeti.
Senim gramotalaryn Moldova Respýblıkasynyń elshisi Igor Moldovan, Vetnam Sotsıalıstik Respýblıkasynyń elshisi Than Le Ngýen, Koreıa Respýblıkasynyń elshisi Kı Hon Chjon, Ońtústik Afrıka Respýblıkasynyń elshisi Lýngısanı Domınık Ntombella, Slovakııa Respýblıkasynyń elshisi Lıýbomır Regak, Germanııa Federatıvtik Respýblıkasynyń elshisi Haıke Renate Paıch, Ázerbaıjan Respýblıkasynyń elshisi Alımırzamın Askerov, Slovenııa Respýblıkasynyń elshisi Branko Rakovets jáne Namıbııa Respýblıkasynyń elshisi Monıka Ndılıavıke tapsyrdy.
Memleket basshysy elimizdiń beıbitsúıgish syrtqy saıasat baǵdaryn ustanatynyn aıtty.
– Ózderińizge málim, Qazaqstan qazirgideı asa kúrdeli geosaıası jaǵdaıda beıbit syrtqy saıasat júrgizip keledi. Biz beıbitshilik saltanat qurýǵa tıis dep sanaımyz. Sondyqtan Ortalyq Azııada da, odan tysqary jerlerde de beıbitshilik pen qaýipsizdikti saqtap, yntymaqtastyqty órbitý úshin qoldan kelgen múmkindiktiń bárin jasaımyz, – dedi Prezıdent.
Qasym-Jomart Toqaev saltanatty rásimge qatysýshylarǵa Qazaqstannyń ekonomıkalyq áleýeti jáne ulttyq ekonomıkaǵa shetelden ınvestıtsııa tartý isindegi tabystary jóninde málimet berdi.
– Biz elimizge shetel ınvestıtsııasyn tartý úshin barynsha qolaıly jaǵdaı jasap otyrmyz. Álbette, Qazaqstanǵa kelip jumys istegisi keletin sheteldik kásipkerlerdi jáne iri kompanııalardy qushaq jaıa qarsy alamyz. Ózderińiz biletindeı, bizdiń naryqta iri halyqaralyq kompanııalardyń basym bóligi qyzmet etedi. Bul saıasattan aınymaıtynymyzǵa senimdimin. Sheteldik ınvestıtsııaǵa qatysty ashyq esik saıasatyn dáıekti túrde jalǵastyrýǵa nıettimiz, – dedi Prezıdent.
Budan bólek, Memleket basshysy Qazaqstanda júrgizilip jatqan aýqymdy saıası reformalar jóninde aıtty. Onyń qısyndy jalǵasy tarıhı Quryltaı saılaýy bolmaq.
Qasym-Jomart Toqaev elimizdegi túbegeıli ózgerister halyqaralyq qoǵamdastyqpen yntymaqtastyqty nyǵaıtatyn tyń múmkindikterge jol ashatynyna senim bildirdi.
Sóz sońynda Prezıdent Astananyń elshiler ókildik etetin memlekettermen qarym-qatynasty nyǵaıtyp, san qyrly yqpaldastyqty damytýǵa múddeli ekenin rastady. Sondaı-aq memleketter basshylaryna jyly lebizin joldady.
Osyǵan deıin Memleket basshysy 2027-2029 jyldarǵa arnalǵan bıýdjettiń negizgi basymdyqtaryn aıqyndady.
