Qasym-Jomart Toqaev birqatar memlekettiń elshilerinen senim gramotalaryn qabyldady
ASTANA. KAZINFORM - «Aqorda» rezıdentsııasynda alty memlekettiń tótenshe jáne ókiletti elshileriniń Qazaqstan Prezıdentine senim gramotalaryn tapsyrý rásimi ótti.
Senim gramotalaryn Mysyr Arab Respýblıkasynyń elshisi Ibtıssam Rakha Ahmed Hasan, Serbııa Respýblıkasynyń elshisi Vladımır Iovıchıch, Lıýksembýrg Uly Gertsogtiginiń elshisi Tomas Raızen, Avstralııa elshisi Djon Ýılıam Gırıng, Kolýmbııa Respýblıkasynyń elshisi Ektor Isıdro Arenas Neıra, Sırııa Arab Respýblıkasynyń elshisi Bashar Djafarı tapsyrdy.
Memleket basshysy dıplomattardy elimizdegi mıssııalarynyń resmı bastalýymen quttyqtap, Qazaqstannyń beıbitsúıgish ári konstrýktıvti syrtqy saıasat ustanatynyna nazar aýdardy.
– Biz barlyq elmen, eń aldymen, kórshiles memlekettermen tyǵyz yntymaqtastyq ornatyp, jaqsy qarym-qatynas jasaǵymyz keledi. Bul joldyń tabysty bolatynyna senimdimin. Biz ártúrli baǵytta, sonyń ishinde ekonomıka, ınvestıtsııa salalarynda jáne saıası dıalog turǵysynda yqpaldastyqty nyǵaıtý úshin qoldan kelgen sharanyń bárin jasaımyz. Qazaqstan sizderdiń halyqaralyq arenadaǵy senimdi seriktesterińiz bolatynyna sendirgim keledi, – dedi Prezıdent.
Qasym-Jomart Toqaev elshilerge tabys tilep, olarǵa óz mindetterin atqarý barysynda Qazaqstan Úkimeti tarapynan barynsha qoldaý kórsetiletinin atap ótti. Sondaı-aq Prezıdent olardyń memleketteri basshylaryna izgi tilegi men sálemin joldady.
