Qasym-Jomart Toqaev birqatar memlekettiń elshilerinen senim gramotalaryn qabyldady
ASTANA.KAZINFORM - Aqordada Qazaqstan Prezıdentine segiz memlekettiń tótenshe jáne ókiletti elshileriniń senim gramotalaryn tapsyrý rásimi ótti, dep habarlaıdy Aqordanyń baspasóz qyzmeti.
Senim gramotalaryn Norvegııa Koroldiginiń elshisi Helena Sand Andresen, Argentına Respýblıkasynyń elshisi Enrıke Ignasıo Ferrer Vıeıra, Gana Respýblıkasynyń elshisi Koma Stım Djehý Appıah, Malı Respýblıkasynyń elshisi Seıdý Kamıssoko, Gambııa Respýblıkasynyń elshisi Alkalı Fanka Konte, Bangladesh Halyq Respýblıkasynyń elshisi Muhammed Nazrýl Islam, Shrı-Lanka Demokratııalyq Sotsıalıstik Respýblıkasynyń elshisi Shobını Gýnasekera, Bosnııa jáne Gertsegovına elshisi Ivan Orlıch tapsyrdy.
Qasym-Jomart Toqaev dıplomattarǵa Qazaqstannyń áleýmettik-ekonomıkalyq jáne saıası damý perspektıvasy jóninde áńgimeledi.
– Syrtqy syn-qaterlerge qaramastan Qazaqstan aımaqtaǵy turaqty ári ekonomıkasy qarqyndy el sanalady. Degenmen biz qol jetkizgen jetistikterge toqmeıilsimeı, ekonomıkalyq reformalardy dáıekti túrde jalǵastyryp kelemiz. 15 naýryz kúni elimizde jańa Konstıtýtsııa boıynsha jalpyhalyqtyq referendým ótedi. Memleketti odan ári órkendetý jolyndaǵy bul mańyzdy qujatty halqymyz qoldaıdy dep oılaımyz. Jańa Konstıtýtsııa Qazaqstanda qolǵa alynǵan irgeli ózgeristerge berik negiz qalap, demokratııalandyrý men jan-jaqty jańǵyrtý isine qomaqty úles qosady, sol arqyly elimizdi damytýda tyń múmkindikterge jol ashyp, halyqtyń ál-aýqatyn arttyrady degen úmittemiz, – dedi Prezıdent.
Memleket basshysy Qazaqstannyń beıbit syrtqy saıasat júrgizetinin atap ótti. Prezıdenttiń aıtýynsha, álemdegi barlyq kıkiljińder men qaqtyǵystar dıplomatııalyq quraldar arqyly tek beıbit jolmen sheshilýge tıis. Qasym-Jomart Toqaev Qazaqstan Shyǵanaq elderine árdaıym tilektes ekenin jáne shıelenistiń tezirek sheshilýine úmit artatynyn jetkizdi.
Kezdesý sońynda Prezıdent shet memleketter elshileriniń jaýapty qyzmetine tabys tiledi.
Memleket basshysy Energetıka mınıstri Erlan Aqkenjenovti qabyldady.
