Qasym-Jomart Toqaev: Bir palataly jańa Parlamentte Prezıdent kvotasy bolmaıdy

ASTANA. KAZINFORM - Prezıdent Qasym-Jomart Toqaev aýyl ákimderiniń dıalog-platformasynda bıylǵy Joldaýynda bir palataly Parlament qurý týraly bastama kótergenin atap ótti.

Conymen qatar búginde Parlamenttiń qurylymyna qatysty kóptegen usynys kelip túsip jatqanyn aıtty.

- Bul osyǵan deıingi saıası ózgeristerdiń zańdy jalǵasy deýge bolady. Biz «Kúshti Prezıdent – yqpaldy Parlament – esep beretin Úkimet» qaǵıdatyn ornyqtyra túsemiz, ıaǵnı elimiz Prezıdenttik Respýblıka bolyp qala beredi. Jańa bastama qoǵamda qyzý talqylanyp jatyr. Parlamenttiń qurylymyna qatysty kóptegen usynys kelip túsýde. Mysaly, depýtattardyń sany halyq sanyna sáıkes, ıaǵnı proportsıonaldy bolýǵa tıis degen oılar aıtylýda. Mundaı ustanymmen qaraıtyn bolsaq, olardyń sany 200 adamǵa jetedi. Qazir qos palatada 148 depýtat bar. Parlamenttik reforma – eki palatany jaı biriktire salý degen sóz emes. Menińshe, depýtat sanyn tym kóbeıtýdiń qajeti joq. Kerisinshe, ońtaılandyrý kerek, Parlamenttiń jumysyn jetildirý qajet. Mysaly, bir palataly jańa Parlamentte Prezıdent kvotasy bolmaıdy. Barlyq depýtattar birdeı tártippen saılanýy qajet. Bul – aldaǵy Parlamenttik reforma aıasynda jasalatyn asa mańyzdy qadam. Muny jaqsy uǵynyp, jurtshylyqqa keńinen túsindirý qajet, - dedi Memleket basshysy.

Prezıdentnaǵyz kásibı Parlamentti jasaqtaýymyz kerek ekenin aıtty. Conymen qatar Konstıtýtsııaǵa engiziletin túzetý óte kóp bolýy múmkin ekenin atap ótti.

- Zań shyǵarý organyna bilikti ári tájirıbeli mamandar, ıaǵnı óz isiniń maıtalmandary kelýge tıis. Bir sózben aıtqanda, biz naǵyz kásibı Parlamentti jasaqtaýymyz kerek. Jańa komıtetter qurý máselesin qarastyrý qajet. Tsıfrlandyrý, aımaqtardy damytý jumysymen aınalysatyn komıtetter óz aldyna bólek bolǵany jón dep sanaımyn. Bul máselelerdi arnaıy jumys toby muqııat zerdeleıdi. Osy reformaǵa qatysty basqa da kóptegen usynystar bar. Sonyń bárin ábden pysyqtap, keıin jarııalaımyz. Meniń de osy asa mańyzdy reforma boıynsha usynystarym bar. Jalpy, Konstıtýtsııamyzǵa engiziletin túzetý óte kóp bolýy múmkin. Sondyqtan referendým barysynda halyq jańa Ata Zańǵa daýys beretin bolady dep aıtsaq, qatelespeımiz. Osyndaı kúrdeli, jaýapty jaǵdaıda elimizde tynyshtyq, turaqtylyq bolýy kerek. «Zań men tártip» tujyrymdamasyn bárimiz bir qoǵam bolyp saqtaýymyz kerek. Quqyq qorǵaý organdary óz kásibıligin kórsetýi qajet. Arandatýshylarǵa nemese «las, kóleńkeli» saıasatpen aınalysqysy keletin adamdarǵa jol bermeımiz, - dedi Prezıdent.

Aıta keteıik, 2029 jylǵa deıin «Aýyl amanaty» baǵdarlamasyna 600 mıllıard teńgege jýyq qarajat bólinedi.