Qasym-Jomart Toqaev Bozymbaevqa ulttyq joba boıynsha tapsyrma berdi
ASTANA. KAZINFORM — Memleket basshysy Qasym-Jomart Toqaev Premer-Mınıstrdiń orynbasary Qanat Bozymbaevty qabyldady, dep habarlaıdy Aqorda.
Qasym-Jomart Toqaevqa Energetıkalyq jáne kommýnaldyq ınfraqurylymdy jańǵyrtý boıynsha ulttyq jobanyń ázirlený barysy jóninde aqparat berildi.
Aldaǵy bes jylǵa arnalǵan joba aıasynda energetıkalyq jáne kommýnaldyq sektordyń qoldanystaǵy ınfraqurylymyn jańartý, 6 myń megavattan asa elektr qýaty generatsııasyn iske qosý ári jańǵyrtý jumystaryn júrgizý qarastyrylǵan.
Jobanyń jalpy quny 10 trıllıon teńgeden asady. Qajetti qarajat naryqtan zaım negizinde, sondaı-aq ishinara respýblıkalyq bıýdjetten tartylady.
Keshendi jańǵyrtý jumystary energetıkalyq nysandar men kommýnaldyq sektordyń tozýyn birshama tómendetip, halyqtyń turmys-tirshiligin qamtamasyz etý júıelerin jetildiredi.
Budan bólek, Prezıdentke óńirlik saıasatty iske asyrýdyń jańa tásilderi týraly málimet berildi. Bul shara oblystar arasyndaǵy áleýmettik, óndiristik jáne kommýnaldyq ınfraqurylymdy qamtamasyz etý barysyndaǵy alshaqtyqty joıýǵa baǵyttalǵan.
Qanat Bozymbaevtyń aıtýynsha, Prezıdenttiń tapsyrmasyn oryndaý maqsatynda memlekettik baǵdarlamalardy júzege asyrýdy júıeli úılestirý úshin Úkimet janynan Óńirlik saıasat jobalyq keńsesi qurylady.
Budan bólek, Memleket basshysyna Mańǵystaý oblysynda avıatsııalyq habty damytý jónindegi ınvestıtsııalyq jobany iske asyrý perspektıvasy baıandaldy. Atalǵan joba óńirdiń ekonomıkalyq ósimine tyń serpin berip, halyqaralyq kólik-logıstıka tizbeginiń mańyzdy bóligine aınalady.
Qasym-Jomart Toqaev Qanat Bozymbaevqa Energetıkalyq jáne kommýnaldyq ınfraqurylymdy jańǵyrtý boıynsha ulttyq jobany muqııat daıyndap, jyl sońyna deıin bekitýdi tapsyrdy. Sonymen qatar Óńirlik saıasat tujyrymdamasyn belsendi iske asyrý mindetin júktedi.
Eske salsaq, buǵan deıin Úkimet otyrysynda Premer-Mınıstrdiń orynbasary Qanat Bozymbaev Energetıkalyq jáne kommýnaldyq ınfraqurylymdy jańǵyrtýǵa 10 trln teńgeden astam ınvestıtsııa qajet ekenin aıtty.