Qasym-Jomart Toqaev Bolgarııa Prezıdentin qarsy aldy
ASTANA. KAZINFORM – Memleket basshysy Qasym-Jomart Toqaev Aqordada elimizge resmı saparmen kelgen Bolgarııa Prezıdenti Rýmen Radevti qarsy aldy.
Aldymen Qasym-Jomart Toqaev pen Rýmen Radev bir-birine resmı delegatsııa múshelerin tanystyrdy. Osydan keıin mártebeli meımannyń saparyna oraı saltanatty rásimder zalynda sap túzegen qurmet qaraýylynyń bastyǵy Memleket basshylaryna sálemdik baıanat berdi. Prezıdent orkestri eki eldiń memlekettik Ánuranyn oryndady.
Ánurandardy tyńdap bolǵannan keıin Qasym-Jomart Toqaev pen Rýmen Radev kilemshe boıymen Qazaqstan Respýblıkasynyń Memlekettik Týyna qaraı júrdi.
Onyń aldyna kelgende meıman toqtap, basyn sál ıip, óziniń qurmetin bildirdi. Sonan soń meıman men Prezıdent qurmetti qaraýyl sapynyń boıymen júrdi. Qurmetti qaraýyl bastyǵymen qoshtasty.
Joǵary deńgeıde ótetin kelissózder barysynda qazaq-bolgar saýda-ekonomıkalyq jáne ınvestıtsııalyq yntymaqtastyǵynyń perspektıvasy talqylanbaq.
Buǵan deıin Kazinform tilshisi eki eldi ne baılanystyratynyn, keleshek kelisim qaı salaǵa oıysýy múmkin ekenin saralaǵan edi.